رووداو دیجیتاڵ
لە شاری بەغدا، کۆڕێکی گفتوگۆ بۆ تاوتوێکردنی دیدگای نێچیرڤان بارزانی، سەرۆکی هەرێمی کوردستان بۆ پەیوەندییەکانی نێوان هەولێر و بەغدا بەڕێوەچوو. تێیدا سەرۆکی هەرێمی کوردستان وەک "کەسایەتییەکی پراگماتیک" وێنا کرا کە هەمیشە جەختی لە سێ چەمکی سەرەکی کردووەتەوە: هاوبەشی، تەبایی و پابەندی بە دەستوور.
لە کۆڕە گفتوگۆکەدا کە رۆژی یەکشەممە 23ی ئابی 2026 بەڕێوەچوو، ژمارەیەک لە داڕێژەرانی دەستووری عێراق و بڕیاردەرانی باڵا ئامادە بوون، لەوانە: مەحموود مەشهەدانی، سەرۆکی پێشووتری پەرلەمان، ساڵح موتڵەگ، جێگری پێشووتری سەرۆکوەزیران، نەسار روبەیعی، وەزیری پێشوو، لەگەڵ ژمارەیەک بەرپرس و ئەکادیمی و میدیاکار.
ناونیشانی تەوەری سەرەکی کۆڕە گفتوگۆکە بریتی بوو لە "هاوبەشی و دەستوور؛ نەگۆڕەکانی پەیوەندی لە هاوسەنگیی گۆڕانکارییەکاندا.. تێڕوانینی نێچیرڤان بارزانی، سەرۆکی هەرێمی کوردستان بۆ پەیوەندیی نێوان بەغدا و هەولێر و پێگەی عێراق لە ژینگە هەرێمییەکەیدا".
لە کۆڕبەندەکە شیکردنەوە بۆ دیدگای نێچیرڤان بارزانی، سەرۆکی هەرێمی کوردستان کرا، کە تێیدا بە ''کەسایەتییەکی لێبووردە و پراگماتیک'' لە مامەڵەکردن لەگەڵ بەغدا وێنا کرا. بەشداربووان رایانگەیاند، سەرۆکی هەرێمی کوردستان هەمیشە جەختی لەسەر سێ چەمکی سەرەکی کردووەتەوە: ''هاوبەشی، تەبایی و پابەندی بە دەستوور.''
لە دانیشتنی یەکەمی دیالۆگەکەدا، کە تایبەت بوو بە رەهەندە سیاسییەکان، گفتوگۆ لەبارەی چۆنیەتیی پاراستنی پرەنسیپەکانی حوکمڕانی و هاوبەشیی نیشتمانی لەژێر رۆشنایی گۆڕانکارییە خێراکانی ناوچەکەدا کرا. ئامادەبووان کۆک بوون لەسەر ئەوەی کە پێگەی عێراق لەسەر ئاستی هەرێمی، پەیوەستە بە رێکخستنەوەی نێوماڵی عێراق و چارەسەرکردنی کێشەکانی نێوان هەولێر و بەغدا.
لە دانیشتنی دووەمدا، وردەکارییە ئابوورییەکان تەوەری سەرەکی بوون. پرسی نەوت و گاز، مافە داراییەکان و مووچەی فەرمانبەرانی هەرێمی کوردستان، وەک کلیلی سەقامگیریی دەوڵەت باسیان لێوە کرا. هەروەها بەشداربووان هۆکارەکانی بەردەوامیی کێشەکانیان دەستنیشان کرد و چەند پێشنیازێکیان بۆ بەهێزکردنی پابەندبوون بە دەستوور خستەڕوو.
دامەزراوەی ئەلفەراهیدی بۆ دیالۆگ و گەشەپێدان، لە راگەیێندراوێکدا ئامانجی رێکخستنی کۆڕی گفتوگۆکەی خستەڕو و رایگەیاند: ''ئامانج لەم کۆڕە گفتوگۆیە، دروستکردنی کەشێکی جیددییە بۆ گفتوگۆ و پڕکردنەوەی ئەو بۆشاییانەی لەنێوان هێزە سیاسییەکان و دەستەبژێرە جیاوازەکاندا هەن. دەمانەوێت دوور لە گرژی و جەمسەرگیری، چارەسەری واقیعی بۆ کێشە نیشتمانییەکان پێشکێش بکەین.''
ئەم کۆڕە گفتوگۆیە دەستپێکی زنجیرەیەک گفتوگۆیە کە بڕیارە کەسایەتییە نیشتمانییەکان و لایەنە پەیوەندیدارەکان لە دەوری یەک مێز کۆبکاتەوە، بە ئامانجی بەهێزکردنی متمانەی نێوان هەولێر و بەغدا.
لە کۆتایی دا جەخت کرایەوە: ''هیوادارین ئەمە ببێتە سەرەتایەک بۆ چەسپاندنی سەقامگیریی سیاسی و ئابووری لە عێراقدا، لە رێگەی پەرەپێدانی رێبازێکی واقیعی بۆ چارەسەرکردنی کێشە هەڵپەسێردراوەکان و قووڵکردنەوەی چەمکی هاوبەشیی نیشتمانی.''
