رووداو دیجیتاڵ
وەزارەتی کۆچ و کۆچبەرانی عێراق رایگەیاند، بەگوێرەی ئەو پلانەی دایانناوە، کۆتایی ئەم ساڵ کەمپی جەدعە لە نەینەوا دادەخرێت، کە کەسوکاری چەکدارانی داعشی تێدایە.
عەلی جەهانگیر، گوتەبێژی وەزارەتی کۆچ و کۆچبەرانی عێراق سێشەممە 25-8-2026 بە تۆڕی میدیایی رووداوی راگەیاند: بەگوێرەی ئەو پلانەی دایانناوە، کۆتایی ئەم ساڵ کەمپی جەدعە لە نەینەوا دادەخرێت، ئەوەش لە دوای ئەوەی ئەو خێزانانەی لەوێ ماون دەگەڕێندرێنەوە زێدی خۆیان.
کەمپی جەدعە تایبەتە بەو عێراقیانەی کە کەسوکاری چەکدارانی داعش بوون و لە کەمپی هۆل لە رۆژئاڤای کوردستانەوە گەڕێندراونەتەوە.
عەلی جەهانگیر رایگەیاند، ئێستا نزیکەی سێ هەزار کەس لە کەمپی جەدعە ماون و رێکارە پێویستەکانیان بۆ دەگیرێتەبەر بۆ گەڕانەوەیان.
لەو کەمپەدا پرۆسەی شایاندنەوە بۆ کەسوکاری چەکدارانی داعش دەکرێت، کە زۆربەیان ژن و منداڵن، ئەوەش بەر لەوەی بگەڕێندرێنەوە زێدی خۆیان.
لە ساڵی 2021ـەوە کە گەڕانەوەی ئەو کەسانە بۆ عێراق دەست پێکردووە، 21 هەزار و 500 کەس گەڕێندراونەتەوە بۆ کەمپەکە و زیاتر لە 18 هەزاریان چوونەتەوە زێدی خۆیان لە پارێزگاکانی عێراق.
