مالیکی: ئەگەر سنووردارکردنی چەک بگۆڕێت بۆ پێکدادان، مەترسییەکی گەورەیە

رووداو دیجیتاڵ

سەرۆکی هاوپەیمانیی دەوڵەتی یاسا بە گرنگی دەزانێت دۆسیەی سنووردارکردنی چەک لە دەستی دەوڵەت، دوور لە رووبەڕووبوونەوە یەکلا بکرێتەوە و دەڵێت، ئەگەر دۆسیەکە بگۆڕێت بۆ پێکدادانی نێوان دەوڵەت و گرووپە چەکدارەکان، مەترسییەکی گەورە دروست دەبێت.

نووری مالیکی، سەرۆکی هاوپەیمانیی دەوڵەتی یاسا رایگەیاند: عێراق بە قۆناخێکی هەستیاردا تێپەڕدەبێت، کە پێویستی بە بەرپرسیارێتی و دانایی و هەوڵە، هەوڵ هەیە بۆ ئەوەی "ئاگر لە واقیعی سیاسی" بەربدرێت و دۆخەکە بشێوێندرێت.

نووری مالیکی گوتی، گرنگە کە دۆسیەی سنووردارکردنی چەک لە دەستی دەوڵەت، دوور لە رووبەڕووبوونەوە و بارگرژی چارەسەر بکرێت و هۆشداریدا لەوەی ئەو دۆسیەیە بگۆڕێت بۆ پێکدادان لە نێوان دەوڵەت و گرووپەکان و ئەوە "بە مەترسییەکی گەورە" ناودەبات.

ئەو گوتانەی مالیکی لە دیدارێکدا بوو لەگەڵ ژمارەیەک لە شرۆڤەکارانی سیاسی کە رۆژی چوارشەممە، 26ـی ئابی 2026، لە بەغدا پێشوازی لێکردن.

سەرۆکی هاوپەیمانیی دەوڵەتی یاسا رایگەیاند، هەر رووبەڕووبوونەوەیەکی ناوخۆیی بە زیان بۆ هەموو عێراق دەبێت نەک تەنیا یەک پێکهاتە.

مالیکی دەڵێت: "هەر کەسێک وا پێشبینی بکات کە هەر ململانێیەکی چاوەڕوانکراو لە نێوان شیعەدا دەبێت، بەهەڵەدا چووە و حکومەت و هاوپەیمانیی چوارچێوەی هاوئاهەنگی رێگە نادەن وڵات تووشی شەڕی ناوخۆیی بێت."

سەرۆکی هاوپەیمانیی دەوڵەتی یاسا یەکێکە لە سێ ئەندامی لیژنەیەکی هاوپەیمانیی چوارچێوەی هاوئاهەنگی کە دانوستاندن لەگەڵ گرووپە چەکدارەکان دەکەن لەبارەی کۆنترۆڵکردنی چەک.

نووری مالیکی گوتی: "چوارچێوەی هاوئاهەنگی بەردەوام پاڵپشتیی حکومەت دەکات. ئەگەر تێبینی لەبارەی کارکردنی حکومەت هەبێت، مانای ئەوە نییە بە گۆڕینی حکومەت یان رووخاندنی رازی بێت."