رووداو دیجیتاڵ
دەستەی دەستپاکیی عێراق فرۆشتنی موڵکێکی حکومی لە ئەنبار هەڵدەوەشێنێتەوە کە 550 دۆنمە و بە نیوەی نرخی راستەقینە فرۆشراوە.
دووشەممە 31ی ئابی 2026، دەستەی دەستپاکیی عێراق وردەکاریی ئەو دۆسیەیەی لە راگەیێندراوێکدا بڵاوکردەوە.
بەگوێرەی دەستەکە، لە فەرمانگەی موڵکی دەوڵەت و بەڕێوەبەرایەتیی پلاندانانی شارسازیی ئەنبار لێکۆڵینەوەیان لەو دۆسیەیە کردووە.
ئەو زەوییە 550 دۆنمە و بەبێ وەرگرتنی رەزامەندیی بەڕێوەبەرایەتیی شارەوانیی رومادی ناوەندی پارێزگای ئەنبار بە هاووڵاتییەک فرۆشراوە.
نرخی فرۆشتنی ئەو موڵکە بە 13 ملیار و 750 ملیۆن دینار دیاریکراوە، لەسەر بنەماى خەمڵاندنی نرخی یەک دۆنمی ئەو زەوییە بە 25 ملیۆن و 90 هەزار دینار، لەکاتێکدا بەگوێرەى دەستەى دەستپاکى نرخی خەمڵێندراوی راستەقینەی یەک دۆنمى موڵکەکە 60 ملیۆن دینارە؛ بەوپێیەی نرخی راستەقینەی ئەو موڵکە 33 ملیار دینارە و لە فرۆشتنیدا 19 ملیار و 250 ملیۆن دینار کەمتر نووسراوە.
بەگوێرەی بڕیاری دادگا، رێکارەکانی فرۆشتنی ئەو زەوییە راگیراوە، گوتە لە نوێنەری یاسایی هەردوو فەرمانگەی موڵکی دەوڵەت و تۆماری خانووبەرەی ئەنبار و دەستەی گشتیی باج لەبارەی ئەو دۆسیەیە وەرگیراوە.
