رووداو دیجیتاڵ
بڕیاربوو دادگەی باڵای فیدراڵیی عێراق لەبارەی سێ سکاڵای جیاواز کە لەلایەن چەند پەرلەمانتارێکەوە تۆمارکراون، کۆببێتەوە. بەڵام دانیشتنەکەی بۆ کۆتایی مانگی داهاتوو دواخست.
نێوەڕۆک و داواکاریی سکاڵاکانی دژی حکومەتی هەرێمی کوردستان و پەرلەمان:
- سکاڵای رێبوار ئەوڕەحمان، پەرلەمانتاری نەوەی نوێ دژی حکومەتی هەرێمی کوردستان بە مەبەستی رێگریکردن لە ئەنجامدان یان هەڵوەشاندنەوەی گرێبەستی ستراتیژی لە کەرتەکانی نەوت، گاز، کارەبا و سامانە سرووشتییەکان.
- سکاڵای عەلی حەمەساڵح، ئەندامی خولی شەشەمی پەرلەمانی کوردستان دژی سەرۆکی تەمەنی پەرلەمانی کوردستان بۆ دەرکردنی بڕیاری نادەستووریبوونی بەردەوامیی پەرلەمان بەهۆی پەککەوتنی دانیشتنەکان بۆ نزیکەی دوو ساڵ.
- سکاڵای دووەمی عەلی حەمەساڵح بۆ گۆڕینی حکومەتی هەرێمی کوردستان بۆ حکومەتی کاربەڕێکە.
عەلی حەمەساڵح بە رووداوی گوت: "هەردوو سکاڵاکەمان کە داوامان کردبوو حکومەت بکرێتە کاربەڕێکەر و پەرلەمان هەڵبوەشێتەوە، دواخرا بۆ 26ی مانگی داهاتوو دواخرا."
رووداو زانیویەتی سکاڵای پەرلەمانتارەکەی نەوەی نوێش بەهەمان شێوە بۆ 26ی 10 دواخراوە.
رۆژی 14ی ئەم مانگەش، دادگەی فیدراڵیی عێراق سکاڵایەکی دژی درێژکردنەوەی ماوەی عەبدولجەبار عەزیز، وەک سەرۆکی ئەنجوومەنی باڵای دادوەریی هەرێمی کوردستان رەتکردەوە.
