رووداو دیجیتاڵ
بەهای دینار بەرامبەر دۆلار لە بازاڕەکانی هەرێمی کوردستان و بەغدا بە نزمی ماوەتەوە و ئەمڕۆ نرخی 100 دۆلار لە دەوروبەری 158 هەزار و 500 دینار مامەڵەی پێوە دەکرێ.
رۆژی یەکشەممە، 20ی ئەیلوولی 2026، سابیر باواجی، سەرۆکی ئەنجوومەنی ئاڵوگۆڕی دراو لە هەولێر بە تۆڕی میدیایی رووداوی راگەیاند: "بەهای 100 دۆلاری ئەمریکی ئەمڕۆ بە 158.700 مامەڵەی پێوە دەکرێ و بە بەرزی ماوەتەوە."
بە گوتەی سەرۆکی ئەنجوومەنی ئاڵوگۆڕی دراو لە هەولێر، دۆخی ناوخۆیی عێراق لە رووی ئەمنی و ئابوورییەوە، هۆکاری سەرەکی دابەزینی بەهای دینارە بەرامبەر دۆلار.
سابیر باواجی پێشبینی دەکات سەرەتای مانگی داهاتوو بەهای دینار بەرز ببێتەوە.
هاوکات جەبار گۆران، پسپۆڕی کارگێڕیی دارایی و گوتەبێژی بازاڕی دۆلارەکەی سلێمانی بە رووداوی گوت: "بڕێکی زۆر دیناری عێراقی 25 هەزاری و 50 هەزاری هاتووەتە بازاڕەکانەوە و ئەوەش بووەتە هۆکاری دابەزینی بەهای دینار."
وەک گوتەبێژی بازاڕی دۆلارەکەی سلێمانی ئاماژەی پێدەکات، ترسی هاووڵاتییان لە سزای ئەمریکی و داڕووخانی ئابووریی عێراق وایکردووە کە خەڵکی پارەکەیان بە دۆلار بگۆڕنەوە. بەڵام دەڵێت، "ئەوانە تەنیا دەنگۆن بڵاوکراونەتەوە و هیچ بنەمایەکیان نییە."
جەبار گۆران پێشبینی دەکات بەهای دینار بەرز ببێتەوە و دۆخەکە تێپەڕێ.
هاوکات زیا تائی، سەرۆکی سەندیکای کۆمپانیاکانی ئاڵوگۆڕی دراو لە عێراق بە رووداوی گوت: "فاکتەری دەروونی و میدیایی لەم چەند رۆژەی دواییدا کاریگەرییەکی زۆری لەسەر بازاڕ دروستکردووە، بەجۆرێک پێشبینییە نەرێنییەکان زوو بڵاوبوونەتەوە و وایان لە بەشێک لە هاووڵاتییان و بازرگانان کردووە خواست لەسەر کڕینی دۆلاری نەختینە زیاد بکەن، ئەمەش گوشاری کاتیی خستووەتە سەر نرخەکە."
بە گوتەی زیا تائی، دۆخەکە "باش" دەبێت و ئەم هەڵکشانە کاتی دەبێت.
رۆژی شەممە، بانکی ناوەندیی عێراق لە راگەیێندراوێکدا ئاماژەی بەوە کرد، دابەزینی بەهای دینار بەرامبەر دۆلار "بۆ پێشبینییە چەواشەکارەکان و خراپ بەکارهێنانی دۆخی جیۆپۆلەتیکی ناوچەکە دەگەڕێتەوە لەلایەن هەندێک کەسەوە، کە سوودمەندن لە شڵەژاندنی دۆخی ئابووری و دارایی وڵات."
بانکی ناوەندی رایگەیاند، یەدەگی دراوی بیانیی وڵات لە ئاستێکی تەواو پێویستدایە و بەرزبوونەوەی دۆلاریش بۆ "قۆستنەوەی بارودۆخی ناوچەکە" دەگەڕێنێتەوە.
.jpg&w=3840&q=75)