رووداو دیجیتاڵ
وەزارەتی دەرەوەی عێراق کۆتاییهاتنی فەرمیی ئەرکی سەربازیی هاوپەیمانیی نێودەوڵەتی لە عێراق راگەیاند و لە پەیامێکدا رێز و شکۆی بۆ قوربانیدانی شەهیدان و "قارەمانێتیی پێشمەرگە و هێزە چەکدارەکان" دووپاتکردەوە، دەشڵێت: "کۆتاییهاتنی ئەرکی هاوپەیمانان، بە واتای کۆتاییهاتنی هاوئاهەنگی نایەت."
ئەمڕۆ پێنجشەممە، 1ی تشرینی یەکەمی 2026، وەزارەتی دەرەوەی عێراق لە راگەیێندراوێکدا بەبۆنەی کۆتاییهاتنی ئەرکی هاوپەیمانیی نێودەوڵەتی لە 30ی ئەیلوول، لە راگەیێندراوێکدا رایگەیاند. ئەم پێشهاتە عێراق دەگوازێتەوە بۆ قۆناخێکی نوێ تاوەکو بەتەواوی بەرپرسیارێتیی ئاسایش و سەقامگیریی خۆی لە ئەستۆ بگرێت، ئەمەش بەشێکە لە چەسپاندنی سەروەری و سەربەخۆیی بڕیاری ئەمنی.
وەزارەتی دەرەوە لە راگەیێندراوەکەیدا "بە رێز و شکۆوە یادی قوربانیدانی شەهیدانی عێراق و قارەمانێتیی هێزە چەکدارەکان بە هەموو پێکهاتەکانیانەوە، لەوانە هێزەکانی پێشمەرگە و حەشدی شەعبی" دەکاتەوە و رۆڵیان لە بەرەنگاربوونەوەی تیرۆر و تێکشکاندنی داعش بەرز دەنرخێنێت.
هاوکات، عێراق "سوپاس و پێزانینی قووڵی" ئاراستەی ویلایەتە یەکگرتووەکانی ئەمریکا و سەرجەم وڵاتانی هاوپەیمانان کرد بۆ ئەو پشتیوانی و قوربانییانەی لە شەڕی دژ بە داعشدا بەخشیویانە.
لە بەشێکی دیکەی پەیامەکەیدا، وەزارەتی دەرەوەی عێراق روونیکردەوە: "کۆتاییهاتنی فەرمیی ئەرکی هاوپەیمانیی نێودەوڵەتی، بە واتای کۆتاییهاتنی هاوئاهەنگی لەگەڵ وڵاتانی دۆست نایەت."
بەپێی راگەیێندراوەکە، هاوئاهەنگییە ئەمنییەکان لەسەر بنەمای پەیوەندیی دووقۆڵی، رێزگرتن لە سەروەریی خاکی عێراق و بەرژەوەندیی هاوبەش بەردەوام دەبن، کە بوارەکانی "راهێنان، ئاڵوگۆڕی زانیاریی هەواڵگری و بنیاتنانی توانا سەربازییەکان" لەخۆدەگرێت، بۆ ئەوەی رێگری لە سەرهەڵدانەوەی تیرۆر و تووندڕۆیی بکرێت.
