رووداو دیجیتاڵ
پەرلەمانی عێراق رێکارەکانی پەسەندکردنی یاسای دەستەی خۆراک و دەرمان دەستپێدەکات کە هەرێمی کوردستان نوێنەری تیایدا دەبێت و بۆ یەکەمجار ئەو دەستەیە لەعێراق دروست دەکرێت کە بەبێ رەزامەندى دەستەکە هیچ دەرمان و خۆراکێک مامەڵەیان پێوە ناکرێت، سزای پێشێلکردنی رێکارەکانی یاساکە دەگاتە سێ ساڵ بەندکردن و پێبژاردنی 25 ملیۆن دینار.
پڕۆژەیاساکە رۆژی 24ی ئەیلول خوێندنەوەی یەکەمی بۆ کراوە وەک دەستپێکی هەنگاوی جێبەجێکردنی.
ئەرکی دەستەی خۆراک و دەرمان چاودێریکردن و گەرەنتییکردنی شیاویی ئەو خۆراک و دەرمانانە دەبێت کە لەنێوخۆدا هەن بەگوێرەی پێوەرە نێودەوڵەتییەکان، ئەوە جگە لە یەکخستنی لایەنی پەیوەندیدار بۆ چاودێریی لەسەر خۆراک و دەرمان لە یەک دەستەدا.
شێروان دووبەردانی، ئەندامی پەرلەمانی عێراق بە تۆڕی میدیایی رووداوی راگەیاند: پێشتر ئەو دەستەیە لە عێراق نەبووە و یەکەم جارە پێکدەهێنرێت.
بەگوێرەی پڕۆژە یاساکە، دەستەی خۆراک و دەرمان دەستەی بەڕێوەبردنی دەبێت کە لە سەرۆک و 12 ئەندام پێکدێت، یەکێکیان نوێنەری وەزارەتی تەندروستیی حکومەتی هەرێمی کوردستان دەبێت.
شیروان دووبەردانی رایگەیاند، دەسەڵاتی کاری ئەو دەستەیە لە هەرێمی کوردستان پێویستی بە رەزامەندی و بۆچوونی حکومەتی هەرێمی کوردستان دەبێت.
دەستەکە دەسەڵاتی دەبێت رێگری لە هاوردە، هەناردە، فرۆشتن، بانگەشە، دروستکردن و هەڵگرتنی ئەو خۆراک و دەرمانانە بکات کە رێگە بە بەکارهێنانی نادەن.
پڕۆژەیاساکە سزای ئەو کەسانەی دیاریکردووە کە سەرپێچیی رێکارەکان دەکەن لەبارەی خۆراک و دەرمان و چاودێریکردنی، سزاکان بریتین لە بەندکردن لە نێوان شەش مانگ بۆ سێ ساڵ و پێبژاردن لەنێوان 15 ملیۆن بۆ 25 ملیۆن دینار.
.jpg&w=3840&q=75)
