رووداو دیجیتاڵ
شاندێکی باڵای حکومەتی فیدراڵیی عێراق بە سەرۆکایەتیی جێگری سەرۆکوەزیران بۆ کاروباری وزە، لە پارێزگای دهۆک لەگەڵ مەسرور بارزانی، سەرۆکی حکومەتی هەرێمی کوردستان کۆبووەوە و پرسە هاوبەشەکانی نەوت، وزە و کارەبایان تاوتوێ کرد.
ئەمڕۆ یەکشەممە، 25ی تشرینی یەکەمی 2026، شاندێکی باڵای بەغدا بە سەرۆکایەتیی موحسین مەندەلاوی، جێگری سەرۆکوەزیران بۆ کاروباری وزە، و بە بەشداریی باسم محەممەد عەبادی، وەزیری نەوت، عەلی سەعدی وەهیب، وەزیری کارەبا و ژمارەیەک راوێژکار، لە دهۆک کۆبوونەوەیەکی بەرفراوانیان لەگەڵ مەسرور بارزانی و بەرپرسانی حکومەتی هەرێمی کوردستان کرد.
بەگوێرەی راگەیێندراوی نووسینگەی جێگری سەرۆکوەزیرانی عێراق بۆ کاروباری وزە، لە کۆبوونەوەکەدا بە وردی تیشک خرایە سەر رێگەکانی چارەسەرکردنی دۆسیە هەڵپەسێردراوەکانی کەرتی وزە، میکانیزمەکانی هەناردەکردنەوە و بەبازاڕکردنی نەوت و رێکخستنی داهاتەکان، بەجۆرێک کە پرۆسەی بەرهەمهێنان و هەناردە بەپێی چوارچێوە دەستووری و یاساییەکان بێت و مافی هەموو لایەک بپارێزێت.
موحسین مەندەلاوی جەختی لە گرنگیی بەردەوامیی گفتوگۆ و هاوئاهەنگیی نێوان هەولێر و بەغدا کردەوە بۆ گەیشتن بە لێکتێگەیشتنی هاوبەش لە سەرجەم پرسەکاندا، لەگەڵ یەکخستنی پلانەکانی بەرهەمهێنان و وەبەرهێنان بە مەبەستی دابینکردنی پێداویستیی نێوخۆ و زیادکردنی داهاتی گشتی.
لە تەوەرێکی دیکەی کۆبوونەوەکەدا، پرسی کەرتی کارەبا گفتوگۆی لەبارەوە کرا و بڕیاردرا هاوئاهەنگیی نێوان وەزارەتی کارەبای هەرێمی کوردستان و وەزارەتی کارەبای فیدراڵ زیاتر بکرێت.
لە راگەیێندراوەکەدا هاتووە: "هەردوولا رێککەوتوون لەسەر زیادکردنی هاوئاهەنگی بۆ مسۆگەرکردنی جێگیریی پێدانی تەزووی کارەبا، هەروەها دانانی خشتەیەکی کاتیی روون بۆ چارەسەرکردنی کێشە پەیوەندیدارەکان و بەدواداچوونی بەردەوام بۆ جێبەجێکردنیان، بە مەبەستی نەهێشتنی ئاستەنگەکان و پتەوکردنی هاوبەشیی ستراتیژیی نێوان بەغدا و هەولێر."
