رووداو - هەولێر
سەرۆکی حکومەتی هەرێمی کوردستان بەبۆنەی سەری ساڵی بابلی "ئاشووری- کلدانی" و جەژنەکانی ئەکیتۆ، پەیامێکی پیرۆزبایی ئاراستەی کلدانی، ئاشووری و سریانییەکانی هەرێمی کوردستان و جیهان کرد و هیوای خێر و خۆشیی بۆ خواستوون.
لە پەیامەکەی مەسروور بارزانی، سەرۆکی حکومەتی هەرێمی کوردستاندا لەبارەی جەژنی کیتۆوە، هاتووە "هیوادارین ساڵی خێر و خۆشی و تێپەڕاندنی ئەو دۆخە سەختە بێت کە هەرێمی کوردستان و جیهانی گرتووەتەوە بەهۆی بڵاوبوونەوەی ڤایرۆسی کۆرۆنا و لێکەوتە ئابوورییە نەرێنییەکانی".
سەرۆکی حکومەتی هەرێمی کوردستان داوا لە هەموو لایەک دەکات پابەندی رێکار و رێنماییە تەندروستییەکان بن، ئەمەش "بۆئەوەی بە هاوکاریی هەموولایەک بتوانین ئەم دۆخە دژوارە تێپەڕێنین".
مەسروور بارزانی دەشڵێ "هەرێمی کوردستان نموونەیەکی گەشی بەیەکەوەژیانی ئاشتییانەی ئایین و نەتەوەکانە کە مایەی شانازیمانە. حکومەتی هەرێمی کوردستان جەخت لە پابەندبوونی خۆی بە داکۆکیکردن لە مافی گشت پێکهاتەکانی هەرێمی کوردستان و قوڵکردنەوەی کولتووری بەیەکەوەژیانی ئاشتییانە دەکاتەوە".
.jpg&w=3840&q=75)
