رووداو دیجیتاڵ
دوای 48 کاژێر لە مانگرتن، حەوت خۆپێشاندەرە مانگرتووەکەی دەربەندیخان مانگرتنیان شکاند، بەڵام دەڵێن: "لە خۆپێشاندان و گردبووەنەوە بەردەوام دەبین."
هاوکار قادر، یەکێک لە دەستەی راوێژکارانی گردبوونەوە و ناڕەزایی هاونیشتمانییانی دەربەندیخان بە تۆڕی میدیایی رووداوی گوت: "ماوەی 14 رۆژە لە خۆپێشاندان و دەربڕینی ناڕەزایەتی بەردەوامین و تاوەکو وەڵامی داواکارییەکانمان نەدرێنەوە خۆپێشاندان بەردەوام دەبێت."
گوتیشی، "خۆپێشاندانەکان بەشێوەی ئێستا و دوور لە تووندوتیژی بەردەوام دەبن و ئەگەر وەڵامی داواکارییەکانمان نەدرێتەوە هەنگاوی دیکەمان دەبێت."
لەبارەی هەنگاوی دواتریانەوە، هاوکار قادر دەڵێت: "هێشتا دیار نییە رەنگە بۆ گەیاندنی داواکاریی و ناڕەزایەتییەکانمان سەردانی بەغدا بکەین."
بڕیارە ئەمڕۆ، سلێمان محەممەد، قایمقامی دەربەندیخان لەگەڵ تیمێکی قوباد تاڵەبانی، جێگری سەرۆکوەزیرانی هەرێمی کوردستان کۆببنەوە بۆ چارەسەرکردنی کێشەکانی قەزای دەربەندیخان و داواکاری ئەو هاونیشتمانییانەی کە گردبوونەتەوە.
سلێمان محەممەد رۆژی دووشەممە بە رووداوی گوت، لەبارەی سەرجەم ئەو بەڵێنانەی بە هاونیشتمانییانی دەربەندیخان دراون لەگەڵ تیمی قوباد تاڵەبانی گفتوگۆ دەکەن و هاونیشتمانییانیش چاوەڕوانی ئەنجامی ئەو کۆبوونەوەیەن بۆ ئەوەی بڕیار لەبارەی راگرتنی یان بەردەوامی گردبوونەوەکەیان بدەن.
رۆژی 1ی ئەم مانگە، هاونیشتمانییانی دەربەندیخان دەستیان بە گردبوونەوە کرد و داواکاری سەرەکییان دابینکردنی ئاوی خواردنەوە و کارەبایە. ئەو قەزایە گرفتی دابینکردنی ئاوی خواردنەوەی هەیە و بۆ چارەسەرکردنی لە ساڵی 2013 بەردی بناخەی پڕۆژەی پاڵاوگەی ئاوی دەربەندیخان دانرا، بەڵام لەبەر خەرجنەکردنی تەواوی بودجە، کۆمپانیای جێبەجێکار کارەکانی راگرت.
بودجەی پاڵاوگەی ئاوی دەربەندیخان 19 ملیۆن دۆلارە و تائێستا چوار ملیۆن و 500 هەزار دۆلار بۆ کۆمپانیای جێبەجێکار خەرجکراوە و بەو بودجەیە 55٪ی کارەکانی تەواو کردووە.
