رووداو دیجیتاڵ
حەوت هاونیشتمانیی خەڵکی سەقزی رۆژهەڵاتی کوردستان لەلایەن هێزە ئەمنییەکانەوە دەستگیر کران. رێکخراوەکانی مافی مرۆڤ دەڵێن، دوای هەڵکوتانی هێزە ئەمنییەکان بۆ سەر ماڵەکانیان هەر حەوتیان بردراونەتە شوێنێکی نادیار.
بەگوێرەی رێکخراوی مافی مرۆڤی هەنگاو کە لەبارەی رووداوەکانی رۆژهەڵاتی کوردستان چالاکە، دوێنی پێنجشەممە 09-10-2026، هێزەکانی ئیتلاعات لە شاری سەقزی سەر بە پارێزگای سنەی رۆژهەڵاتی کوردستان هەڵیانکوتاوەتە سەر ماڵی لانیکەم حەوت هاونیشتمانی و دەستبەسەریان کردوون.
ناسنامەی ئەو حەوت هاونیشتمانییە (عەبدوڵڵا ئەمینی)، (رەحیم حەقپەرەست)، (محەممەدساڵح حوسێنی)، (محەممەد حەکیمپوور)، (مستەفا قادری)، (خالید رەحیمی) و (حوسێن عەبدوڵڵاهی) راگەیێندراوە.
تاوەکو ئێستا هیچ زانیارییەک لەسەر هۆکاری دەستگیرکردن یان شوێنی راگرتنی ئەو هانیشتمانییانەی سەقز بڵاو نەکراوەتەوە.
دەستگیرکردنی ئەو حەوت کەسە لە کاتێکدایە، بە هەمان شێوە لە شاری کرماشانی رۆژهەڵاتی کوردستانیش هاونیشتمانییەکی تەمەن 22 ساڵان بە ناوی (نیلوفەر حەقی) دەستبەسەر کراوە و تاوەکو ئێستا چارەنووسی نادیارە.
