رووداو دیجیتاڵ
ئەمڕۆ ئیزدییەکان جەژنی قوربانیان پیرۆز کرد. بەیانی زوو چونە سەر گۆڕی ئازیزانیان، دواتر شیرینیان بەخشیەوە، لە ماڵیش مەڕ و ئاژەڵیان سەربڕی و کردیانە قوربانی.
جەژنی قوربان یان حاجیانی ئێزدی، ئەمساڵ هاوکاتە لەگەڵ جەژنی قوربانی موسڵمانان. ئێزدییەکان گۆشتی قوربانی نابەخشنەوە، بەڵکو دەیکەنە خوانێکی خۆش بە برنج و ساوەرەوە لێیدەنێن، پاشان خواردنەکە دەبەخشنەوە.
باسیمە بەرکات کابانی ماڵە و دەڵێ "بەیانیی جەژنی حاجیان، ئێمە هەڵدەستین و قوربانی دەکەین، خۆراک ئامادە دەکەین و دەچین جەژنانە لە یەکدی دەکەین، ئەمە جەژنێکی پیرۆزە و جەژنی قوربانە."
لە شنگال، بەمەبەستی پیرۆزکردنی جەژن، ماڵباتەکان سەردانی یەکدی دەکەن. جەژنی حاجییان یان جەژنی قوربان، یەکێک لە گەورەترین جەژنەکانی کوردانی ئێزدییە.
هاونیشتمانیێکی کوردی ئێزدی بەناوی خدر جردۆ دەڵێ "من، ئەم جەژنە لە تەواوی ئێزدییان و خەڵکانی جیهان پیرۆز دەکەم، لەبەرئەوەی ئەو جەژنە بۆ موسڵمان و ئێزدی گرنگە و ئێمە پێی دەڵێین جەژنی مەزن."
ساڵانە لەنێو ئێزدیاندا لە سەرانسەری جیهان بۆ ماوەی یەک رۆژ ئەو جەژنە پیرۆز دەکرێت، وەکو نەریتی باب و باپیرانیشیان کوردانی ئێزدی بەمەبەستی نزاکردن دەچنە مەزارگە ئایینییەکانیان.
.png&w=3840&q=75)
