سوپای پاسداران دەڵێ، هێرشی کردووەتە سەر دوو بنکەی ئاسمانیی ئیسرائیل

رووداو دیجیتاڵ

سوپای پاسدارانی ئێران دەڵێ، هێرشێکی مووشەکی بۆسەر بنکە ئاسمانییە ستراتیژییەکانی ئیسرائیل ئەنجام داوە. 

پەیوەندییە گشتییەکانی سوپای پاسدارانی کۆماری ئیسلامی ئێران، رۆژی دووشەممە، 8ی حوزەیرانی 2026، راگەیێندراوێکی بڵاوکردەوە و تێیدا هاتووە، هێزی ئاسمانیی سوپا هێرشێکی بۆسەر بنکە ئاسمانییە ستراتیژییەکانی (نەواتیم) و (تەلنۆف)ی ئیسرائیل ئامانج داوە.

بەپێی راگەیێندراوەکە، ئەم هێرشە وەڵامێک بوو بۆ هێرشەکانی ئیسرائیل بۆسەر چەند وێستگەیەکی رادار لە سێ ناوچەی جیاوازی ئێران.

سوپای پاسداران ئاماژەی بەوەش کردووە: "خێرایی لە وەڵامدانەوەی هێرشەکانی سوپای رژێمی زایۆنی و بەرفراوانیی ئامانجەکان، لە تایبەتمەندییە سەرەکییەکانی هێزە چەکدارەکانە لەم قۆناخەی ئۆپەراسیۆنەکەدا".

لە راگەیێندراوەکەدا هاتووە، تەواوی یەکەکانی سوپای پاسداران بۆ هێرشی بەرفراوان لە سەرجەم بەرەکان لە ئامادەیی تەواودان و بەرنامەی خۆیان بە جۆرێک رێکخستووە لەگەڵ پلان و سیناریۆی ئیسرائیل بگونجێت.

رۆژی دووشەممە، سوپای ئیسرائیل رایگەیاند، چەند ئامانجێکی لە نێوەڕاستی ئێران و رۆژئاوای تاران بۆردوومان کردووە، ئەوەش دوای هێرشی مووشەکی شەوی رابردووی ئێران بۆ سەر ئیسرائیل.