حووسییەکان، سعودیە بە 28 هێرشی ئاسمانی لە ماوەی 24 کاژێردا تۆمەتبار دەکەن

رووداو دیجیتاڵ

چەکدارانی حووسی رۆژی یەکشەممە سعودیەیان بە 28 هێرشی ئاسمانیی نوێ بۆ سەر چەند ناوچەیەکی یەمەن تۆمەتبار کرد؛ ئەمەش رۆژێک دوای ئەوە هات کە حووسییەکان، بۆ یەکەمین جار لە ماوەی چەندین مانگی رابردوودا، ریازی پایتەختی سعودیەیان کردە ئامانج.

یەحیا سەریع، گوتەبێژی سەربازیی حووسییەکان لە راگەیێندراوێکدا دەڵێت: "فڕۆکە جەنگییەکانی سعودیە لە ماوەی 24 کاژێری رابردوودا 28 هێرشی ئاسمانییان لە رێگەی فڕۆکەکانی F-15 و تایفوونەوە کردووە، کە لە هەردوو بنکەی خەمیس موشەیت و تائیفەوە فڕیبوون."

پێشتریش دوو رۆژ لەمەوبەر حووسییەکان سعودیەیان بە ئەنجامدانی هێرشی ئاسمانی بە هەمان چڕی تۆمەتبار کردبوو، لە کاتێکدا شانشینی سعودیە رۆژی شەممە حووسییەکانی بە بەئامانجگرتنی پایتەختەکەی بە مووشەکی بالیستی تۆمەتبار کرد، کە ئەمە یەکەم هێرش بوو بۆ سەر ریاز لە دوای سەرهەڵدانەوەی شەڕ و پێکدادانەکانی نێوان هەردوولا لە تەممووزی رابردووەوە.

لە مانگی ئەیلوولی ئەمساڵدا، حووسییەکان کە پێشتریش زۆربەی ناوچە ئاوەدانەکانی یەمەنیان لەژێر دەستدا بوو، هێرشێکی خێرایان کرد و دەستیان بەسەر تەواوی کەناراوەکانی رۆژئاوای وڵاتەکە لەسەر دەریای سووردا گرت، ئەمەش کۆنترۆڵی تەنگەی ستراتیجیی بابولمەندەبی پێبەخشین.

حووسییەکان جەخت لەوە دەکەنەوە کە کەشتیوانی لە تەنگەکەدا کراوە و ئازادە، جگە لەو کەشتییانەی کە سەر بە سعودیەن.

هاوپەیمانیی عەرەبی بە سەرۆکایەتیی سعودیە رۆژی شەممە رایگەیاند، حووسییەکان بەرەبەیان مووشەکێکی بالیستییان بەرەو ریاز هاویشتووە، ئەوەش دوای کەوتنەوەی ئاگرێک لە نزیک فڕۆکەخانەی نێودەوڵەتیی پایتەختی سعودیە.

جەنگی یەمەن لە ساڵی 2014دا بە کۆنترۆڵکردنی سەنعای پایتەخت لەلایەن حووسییەکانەوە دەستیپێکرد و بەرەکانی شەڕ لە ساڵی 2022ـەوە تاڕادەیەکی زۆر بە سڕکراوی مابوونەوە پێش ئەوەی لە تەممووزی ئەمساڵدا شەڕەکە دووبارە دەستپێبکاتەوە.

سعودیە لە ساڵی 2015ـەوە سەرکردایەتیی هاوپەیمانییەک دەکات بۆ پشتیوانیکردنی حکومەتی دانپێدانراوی یەمەن. دەستێوەردانی سەربازی بووە هۆی تەشەنەسەندنی جەنگێک کە یەکێک لە خراپترین قەیرانە مرۆییەکانی جیهانی لەم وڵاتە هەژارەدا دروستکردووە.

نەتەوە یەکگرتووەکان لە ساڵی 2025دا هۆشداری دابوو لەوەی کە 17 ملیۆن کەس لە یەمەن لە هەوڵی بەدەستهێنانی خۆراکی پێویستدان بۆ مانەوە لە ژیاندا، لە کاتێکدا ملیۆنێک کەسی دیکەش رووبەڕووی برسێتیی سەخت و کەمکوڕی بوونەتەوە.