پرسی هەڵبژاردنەکان و پرۆسەی دەنگدان لە کەرکووک و ناوچە کێشە لەسەرەکان، وەک هەر پارێزگایەک و ناوچەیەکی دیکەی عێراق و کوردستانی عێراق نییە، لەبەرئەوە دەبێت زۆر بەرپرسانە مامەڵەی لەگەڵدا بکرێت، بڕیاردان لەسەر چارەنووسی کەرکووک و ناوچەکانی دیکە، دەبێت لەسەر بنەمای بیری نیشتمانی و نەتەوەیی و مرۆیی و راستی و زانیاری دروست بێت.
لە عێراق و کەرکووک و ناوچە کێشە لەسەرەکان بیری نەتەوە پەرستی و مەزهەب پەرستی لە برەو و هەڵکشاندایە، تاوەکو بیری نەتەوە و مەزهەب پەرستی لە زیادبووندا بێت هەڕەشەی پاکتاوکردن و داگیرکردن لەسەر کورد و کوردستان و پێکهاتەکانی دیکەی ناوچەکە زۆر دەبێت، بۆیە تەنیا بەربەست لەبەردەم ئەم هەڕەشە و ئاڵنگارییانە، بەرگریکردنە، بەرگریش تەنیا بە یەک ریزی میللەت دەبێت، چونکە کەرکووک و ناوچە کێشە لەسەرەکان پرسەکەی ئاڵۆز و ناسک و هەستیارە، بۆیە یەک دەنگی و یەک ریزی کورد پێویستە و بەشداریکردن بەشێوەیەکی کارا لە پرۆسەی سیاسی و بە تایبەتی لە هەڵبژاردنەکان و پرۆسەی دەنگدان ئەرکێکی پیرۆزە لەم قۆناخە.
لە ئەزموونی خەباتی سیاسی و شارستانی گەلاندا، دەنگدەر و جەماوەر بە یەکگرتووی زۆربەی کات لایەنێکی هەرە سەرەکی و یەکلاکەرەوە بووە لە پرسە چارەنووسسازەکان و کارە سیاسیەکاندا.
لە هەرجێگایەکیش دەنگدەر و جەماوەر خۆی بە دوور گرتبێت لە پرۆسە و پرسە سیاسیەکان و، باوەڕی بەخۆی نەبووبێت خاوەندارییەتی پرسە سیاسیەکانی خۆی بکات، چارەنووسی جەماوەری لەم جۆرە ناڕۆشن و نادیار و هەمیشە لەژێر هەڕەشە و مەترسیدا دەبێت.
لە هەر پرۆسەیەکی سیاسیدا دەنگدەر و جەماوەر رۆڵی خۆیان نەگێڕا و کەوتنە دەرەوەی کایە سیاسیەکان و هاوبەشی تەواویان نەکرد لە پرسە گرنگ و چارەنووسسازەکان، جەماوەر گیانی بەرپرسیارییەتی تێیدا لاواز دەبێت و نامێنێت، سەرئەنجام جەماوەر دڵسۆزی و خۆشەویستی و پاپەندبوونی نامێنێت بۆ میللەت و نیشتمان کە ئەوەش کارەسات و مەترسیە هەرە گەورەکەیە لە ئەمرۆ و داهاتووی کوردستانی عێراق.
ئەو ناڕازیانەی کە بایکۆتی پرۆسەی دەنگدان دەکەن لە نا ئومێدی و لەبێ بڕوایی و بەشێکی زۆری هێز و لایەنە سیاسیەکانی کوردستان و عێراق، و لە بێ هیوا بوون لە گۆڕانکاری بۆ باشکردنی دۆخی هەرێم و عێراق... دیارە بێ هیوایی و نا ئومێدی بژاردە و ئاماژەیەکی تەندروست نییە بۆ توانا و ئیرادە و ویستی مرۆڤ، مرۆڤی بێ ئومێد و بێ بڕوا دەچێتە خانەی نەبوو، چونکە نا ئومێدی و بێ هیوایی سەرەتایەکە بۆ خۆ بەدەستەوەدان و تەسلیم بوون، و قبووڵکردنی زوڵم و زەلیلی و ڕەزیلی، ئەمە جگە لەوەی بایکۆتی لەم جۆرەش هەر خزمەتی راستەوخۆی رکابەر و نەیاران دەکات.
لە رووی سیاسیشەوە، بایکۆتکردنی هەڵبژاردنەکان و پرۆسەی دەنگدان بە بەردەوامی، بەبێ هۆکارێکی مەنتقی و بڕواپێکراو و، بەبێ ئامادەکردنی بەدیلێکی باش بۆ ئەم قۆناخە، هەڵوێستی دەنگدەران لاواز دەکات، بەم شێوەیە دەنگدەران دوا ئەکەون لە جێبەجێکردنی بەشێک لە ئەرکەکانی خۆیان و، بێبەش دەبن لە بەدەستهێنانی بەشێک لە مافەکانیان، چونکە دەنگدان وەک پڕۆسەیەکی شارستانی هەم مافێکی دەستوورییە و، هەم ئەرکێکی سەرەکی قۆناخەکەیە، بەهۆی دۆخی قەیراناوی و ئاڵۆز و هەستیاری عێراق و کوردستانی عێراق و کەرکووک و ناوچەکێشە لەسەرەکان بە تایبەت.
لەگەڵ هەموو ئەمانەشدا تا ئەمرۆ لە کوردستانی عێراق بژاردەیەکی باشترمان نییە لە خەباتی شارستانی و هەڵبژاردنەکان و بەشداریکردن لە پرۆسەی دەنگدان و بەشەکانی دیکەی خەباتی شارستانی بۆ بەدەستهێنانی ئامانج و داواکاریەکانی جەماوەر.
لەگەڵ هەموو لایەنە خراپەکانی هەڵبژاردنەکان و پرۆسەی دەنگدان لە ماوەی بیست ساڵی رابردوودا لەهەرێمی کوردستان و عێراق، هەڵبژاردنەکان لایەنی باشی هەبووە تاڕادەیەک و گۆڕانکاریشی بەدوای خۆیدا هێناوە.
بەشێوەیەکی گشتی هەرکاتێک دەنگدەران بە گشتی بەشدارییان کردبێت لە پرۆسەی دەنگدان، رووداو گۆڕانکاری نوێ و گرنگی بەدواوەبووە، و هەر کاتێکیش جەماوەر و دەنگدەران بایکۆتی پرۆسەی سیاسی و دەنگدانیان کردبێت بە شێوەیەکی عەفەوی، بێگومان نائومێدی و کێشە و قەیرانی جۆراوجۆری بەدوای خۆیدا هێناوە، و لە هەر قەیرانێکی سیاسی و ئابوریشدا، جەماوەر و دەنگدەران هەمیشە قوربانی و زەرەرمەندی یەکەم بوون.
لەبەر ئەوە بەشداریکردن لە پرۆسەی دەنگدان لە دۆخی ناسک و ناسەقامگیر و ئاڵۆزی ئەمڕۆی عێراق و کوردستانی عێراق و کەرکووک و ناوچە کێشە لەسەرەکان بە تایبەت، ئەرک و بەرپرسیارییەتی نیشتمانییە، خۆدزینەوە و بەشدارینەکردن لە پرۆسەی دەنگدان لەم دۆخەی ئەمڕۆدا، جگە لەوەی زیانی زۆری دەبێت بۆ دەنگدەر خۆی، زیانی گەورە و قورسیشی دەبێت بۆ پرۆسەی سیاسی و پرسی کورد لە کەرکووک و ناوچە کێشە لەسەرەکان و کوردستانی عێراق بە گشتی.
لێرەدا بە پێویستی دەزانم ئەوە بڵێم بە جەماوەر و دەنگدەرانی کەرکووک و ناوچە کێشە لەسەرەکان، کە پرسی هەڵبژاردنەکان و بەشداریکردن لە پرۆسەی دەنگدان و خەباتی شارستانی بەگشتی تەنیا بژاردەیە لە بەردەم جەماوەری کوردستانی عێراق لەم قۆناخەدا و ئەرکی جەماوەر و هەموو هێز و لایەنەکانە ئەوە بکەن بە کولتووری خەبات و تێکۆشانی میللەتەکەمان بۆ نێوخۆی کوردستانی عێراق بۆ گەیشتن بە ئامانجەکان.
