رووداو دیجیتاڵ
مارک ئاندرێ تێر شتیگن، گۆڵپارێزی بارسێلۆنا، کە بەشێوەی خواستن لە ئایاکس ئەمستەردامی هۆڵەندا یاری دەکات، دوای بڕیاری یۆرگن کڵۆپ بۆ ئەوەی لە دوو یاریی ئەڵمانیا بەرامبەر سڕبیا و هۆڵەندا لە چوارچێوەی یارییەکانی نەیشنسلیگدا گۆڵپارێزی سەرەکی بێت، رووبەڕووی رەخنەی تووندی دێتمار هامان، ئەستێرەی پێشووی هەڵبژاردەی ئەڵمانیا بووەوە.
یۆرگن کڵۆپ رۆژی هەینی رابردوو لیستی هەڵبژاردەی ئەڵمانیای بۆ هەردوو یارییەکە راگەیاند و پشتڕاستی کردەوە کە تێر شتیگن گۆڵپارێزی سەرەکی دەبێت، بەهۆی ئاستە باشەکەی لە وەرزی ئێستای لەگەڵ ئایاکس.
کڵۆپ بەرگری لە بڕیارەکەی کرد و گوتی "مارک وەرزێکی زۆر باشی لە ئەمستردام هەیە، بەختەوەرانە ئۆربێگ و نۆبڵیش دوو وەرزی باشیان هەیە، بەڵام ئێمە دەچینە ناو ئەم دوو یارییەوە بە مارک وەک گۆڵپارێزی سەرەکیمان". بەڵام بڕیارەکەی راهێنەری ئەڵمانی رەزامەندیی هەمووانی بەدەستنەهێنا، چونکە هامان بە تووندی رەخنەی لە هەڵبژاردنی تێر شتیگن گرت و ئاماژەی بەوە کرد کە ئەو گۆڵپارێزە بەپێی بۆچوونی ئەو، بەشی ئەوەی نەکردووە لەگەڵ هەڵبژاردەدا جێگەی گۆڵپارێزی سەرەکی بەدەستبهێنێت.
هامان هێرش دەکاتە سەر تێرشتیگن: شایستەی ئەوە نییە
هامان لە لێدوانێکدا کە رۆژنامەی مۆندۆ دیپۆرتیڤۆ گواستویەوەتەوە، گوتی "پێموانەیە شایستەی ئەوە بێت. لەگەڵ هەڵبژاردەدا ئاستێکی باشی پیشان نەداوە".
هەروەها گوتی "ئەوەی ئێستا گۆڵپارێزی سەرەکییە، بۆ ئەوەیە چیدی مانوێل نۆیەر یان ئۆلیڤەر کانمان نییە. پێموانەیە شایستەی ئەوە بێت".
ئەم لێدوانانە لەکاتێکدا دێن کە تێر شتیگن هەوڵ دەدات جێگەی خۆی لە هەڵبژاردەی ئەڵمانیا جێگیر بکات، دوای ئەوەی کڵۆپ متمانەی پێ کردەوە و بۆ یارییەکانی نەیشنسلیگ بانگهێستی کردەوە.
کان بەرگری لە گۆڵپارێزی بارسێلۆنا دەکات
لە لایەکی دیکەوە، ئۆلیڤەر کان، گۆڵپارێزی ئەفسانەیی ئەڵمانیا، بۆچوونێکی جیاوازی لە هامان هەیە و بەرگری لە بڕیاری کڵۆپ دەکات بۆ پێدانی دەرفەت بە تێرشتیگن.
کان گوتی "ئێستا تێر شتیگن لە دۆخێکی باشدا دەردەکەوێت. شایستەی بانگهێشتکردنی بووە. ئێستا پێویستە بە ئاستی یارییەکەی بسەلمێنێت کە شایستەی ئەم دەرفەتەیە".
بەم شێوەیە، بۆچوونەکان لە ئەڵمانیا دابەش بوونەتەوە؛ هامان پێیوایە گۆڵپارێزی بارسێلۆنا شایستەی پۆستی سەرەکی نییە، لە کاتێکدا ئۆلیڤەر کان باوەڕی وایە تێرشتیگن بەشایستەیی ئەو دەرفەتەی پێدراوە و ئێستا دەبێت لەناو یاریگادا توانای خۆی بسەلمێنێت.
