رووداو دیجیتاڵ
فلۆرێنتینۆ پێرێزی سەرۆکی یانەی ریال مەدرید، لە کۆنگرەی گشتیی یانەکەی لە مەدریدی پایتەختی ئیسپانیا دەڵێ، بارسێلۆنا دوژمنە.
پێرێز ئێستا لە کۆنگرەی گشتیی یانەکەی قسە دەکات، رەخنەی تووند لە دەستەی لالیگا و بارسێلۆنای رکابەری دەکات.
لە کۆنگرەی گشتیی ساڵانەی ریال مەدریددا، ئەندامانی کۆنگرە، بوونی رافایێل نادالیان بە ئەندامی دەستەی کارگێڕیی یانەکە پەسندکرد.
رۆژنامەی 'ئەی ئێس' دەڵێ، سەقامگیریی ئابووری و پێویستی گۆڕانکاریی لەسەر ئاستی وەرزشی، هەروەها پەیوەندی لەگەڵ ئەو دوژمنەی کە رێکەوتنی لەگەڵ ناکرێت (لە ئاماژەیەکدا بۆ بارسێلۆنا)، هەروەها پابەندبوونی تەواو بۆ بەردەوامبوونی دادوەریی وەرزشی تاوەکو کۆتایی، دیارترین تەوەری قسەکانی سەرۆکی ریال مەدرید دەبێت، لەبەردەم ئەندامانی کۆنگرەدا.
پێرێز هەروەها باسی ئاساییبوونەوەی پەیوەندی یانەکەی لەگەڵ فیدراسیۆنی تۆپی پێی ئەورووپا (یوفا)، هەروەها سووربوونی یانەکە لەسەر رێگای رەتکردنەوەی شێوازی کارکردنی خاڤیێر تێباسی سەرۆکی لالیگا، دەکاتەوە.
دۆخی ئەمساڵی کۆنگرەی گشتیی یانەی ریال مەدرید، لە دۆخی ساڵانی پێشوو جیاوازە، لەبەرئەوەی یانەکە مانگی حەوتی رابردوو، کۆنگرەی گشتیی خۆی ئەنجامدا و جارێکی دیکە فلۆرێنتینۆ پێرێز، بەسەرۆکی یانەکە هەڵبژێردرایەوە.
رۆژنامەکە دەڵێ، سەرۆکی ریال مەدرید لە وتارەکەیدا هەڵوەستە لەسەر درزی گەورە، لە پەیوەندییەکانی یانەکە لەگەڵ بارسێلۆنا دەکاتەوە، پاشئەوەی پەیوەندییەکانی نێوان هەردوو یانە، لەماوەی رابردوودا گرژی و ناکۆکی زۆری تێکەوت.
پێشبینیکراوە سەرۆکی ریال مەدرید، بەشێکی دیکەی قسەکانی بۆ هێرشکردنەوە و رەخنەگرتن لە تێباس و دەستەی لالیگا تەرخان بکات، بەتایبەت کە یانەکە لەماوەی رابردوودا، هێرشی زۆری کردە سەر دەستەی لالیگا و شێوازی بەڕێوەبردنی خولەکە.




