لە شاری حومسی سووریا حەوت کەس کوژران

رووداو - دیجیتاڵ

لە ئەنجامی دەستڕێژی گوللەی ژمارەیەک چەکدار بۆ سەر پاسێکی نەفەرهەڵگر لە شاری حومسی سووریا، لانیکەم حەوت کەس کوژران و چوار کەسی دیکەش بریندار بوون.

بەپێی هەواڵێکی ئاژانسی فەرمیی هەواڵی سووریا (سانا)، رووداوەکە شەوی چوارشەممە لەسەر پردی مەسیاف لە شاری حومس روویداوە، کاتێک ژمارەیەک چەکدار پەلاماری پاسێکیان داوە و بەو هۆیەوە تەرمی حەوت هاووڵاتیی سڤیل و چوار بریندار گەیێندراونەتە نەخۆشخانەی شارەکە.

سەرچاوە پزیشکییەکان لە نەخۆشخانەی حومس رایانگەیاندووە کە برینی بەشێک لە بریندارەکان سەختە و لەژێر چاودێریی چڕی پزیشکیدان.

تاوەکو ئێستا هیچ گرووپێک بەرپرسیارێتیی خۆی لە هێرشەکە رانەگەیاندووە، لە کاتێکدا هێزە ئەمنییەکانی سووریا دەستیان بە لێکۆڵینەوەی چڕ و گەڕان کردووە بەدوای ئەنجامدەرانی هێرشەکەدا.