رووداو دیجیتاڵ
پارتی کۆمۆنیستی تورکی لە ئەنقەرە خۆپێشاندانێکیان بۆ ئیدانەکردنی سیاسەتی دەرەوەی حکومەت و گرژییەکانی یەمەن رێکخست و هۆشدارییان دایە حکومەتی تورکیا کە "وڵات تێوەنەگلێنێت لە سەرکێشیی یەمەن."
خۆپشاندانەکە ئێوارەی رۆژی چوارشەممە، 21-10-2026 لە مەیدانی سەکاریا لە ئەنقەرە بەرێوەچوو.
خۆپێشاندەران کە زۆرینەیان ئەندام و لایەنگرانی پارتی کۆمۆنیستی تورکیا بوون بە دروشمی "ئیمپریالیستەکان، هاوکارەکانیان بترسن، پارتی کۆمۆنیستی تورکیا لە ئەرکدایە" رێپێوانیان کرد و دروشمی دیکەیان دەگوتەوە وەک "نابینە سەربازی ئیسرائیل!" و "نابینە سەربازی ئەمریکا!".
عەلی ئوفوق ئاریکان ئەندامی پارتی کۆمۆنیستی تورکیا لە راگەیێندراوێکدا گوتی: "با ئەو سەرکێشییەی یەمەن کە وڵاتی تێوەدەگلێنن، وەک گەورەترین تاوانتان لە مێژوودا تۆمار نەکرێت."
ئاریکان گووتیشی:" رێگە نادەین رۆڵەکانمان لە پێناو سعودییەکان بکوژرێن."
خۆپێشاندانەکەی پارتی کۆمۆنیستی تورکیا رەنگدانەوەی نیگەرانییەکانی بەشێک لە رای گشتیی تورکیایە سەبارەت بە تێوەگلانی وڵاتەکەیان لە ململانێیەکی دیکەی رۆژهەڵاتی ناوەڕاستدا، بەتایبەتی دوای ئەزموونەکانی سووریا و لیبیا.
پێشتر چەند پارتێکی بەری ئۆپۆزسیۆنی تورکیا دژایەتی خۆیان بۆ بەشداری تورکیا لە ناردنی سەرباز یان دابینکردنی پاڵپشتی سەربازی بۆ سعودیە و تێوەگلانی تورکیا لەو شەڕەی یەمەن راگەیاندبوو.
تورکیا لە چوارچێوەی رێککەوتننامەی بەرگریی هاوبەشی مەککە، هەوڵی دابینکردنی پاڵپشتی سەربازی دەدات بۆ سعودیە لە دژی حوسییەکان لە یەمەن.
رێککەوتننامەی بەرگریی هاوبەشی مەککە کە لە 16 مادە پێکهاتووە، 7-8-2026 لەنێوان تورکیا، پاکستان و سعودیە واژۆ کرا. ئێستا رێککەوتننامەکە رەوانەی پەرلەمانی تورکیا کراوە تاوەکو بخرێتە دەنگدان.
وەزارەتی بەرگری تورکیا رایگەیاندبوو کە دابینکردنی پاڵپشتی سەربازی بۆ سعودیە لە چوارچێوەی یاساکانی تورکیا دەبێت، دوای پەسەندکردنی رێککەوتننامەکە لە پەرلەمانی وڵاتەکە.
