زانیارییەکان لەبارەی 'دەرکەوتنی کەشتییەکی ئاسمانی' لەسەر خۆر

دوای بڵاوبوونەوەی ئەو گرتەیە، ئەو كەس و رێكخراوانەی باوەڕیان وایە (ناسا) و ئاژنسەكانی دیكە لەژێر چەتری (بیردۆزی پیلانگێڕی)دا، راستییەکانی (دەفرە فڕیوە نەناسراو و شارستانییە دەرەكییە هۆشمەندەكانی گەردوون) لە رای گشتی دەشارنەوە، بڵاویانكردەوە ئەو (تەنە چوارگۆشە تاریكە)ـی لەسەر رووی خۆر دەركەوتووە، كەشتییەكی ئاسمانیی زەبەلاحی سەر بە شارستانییەتێكی دیكەی زۆر هۆشمەندی دەرەوەی زەوی بووە و قەبارەشی لانیكەم 10 جار ئەوەندەی زەویی بووە!

لە بەرامبەردا، ئاژانسی ناسا رایگەیاند، راستە ئەو گرتەیە بە كامێراكانی مانگی دەستكردی (SOHO) وەرگیراون و هیچیش دەستكاریی نەكراوە، بەڵام ئەو تەنەی دەركەوتووە، یەكێكە لە رووداوە دووبارە بووەوەكانی (لەدەستدانی داتای وێنە) كە زۆرجار بەهۆی گرفتێكی تەكنیكی لە كامێرای مانگێكی دەستكرد یان كەشتییەكی ئاسمانیی و تەنانەت لە كامێرا گەڕۆكەكانی سەر رووی هەسارەیەكی وەك مەریخیش روودەدات و كەشتییەكی ئاسمانیی شارستانییەتێكی دیكەی دەرەوەی زەوی نییە.

سكۆت وارینگ، كە وێنەگرێكی فەلەكیی ناودارە و ناوی لەو دیاردەیەدا هاتووە و پێشتریش شیكردنەوەی هەڵەی داوە لەسەر گرتەیەك و پاشان مشتومڕی زۆری لێكەوتووەتەوە، لە كۆتاییدا بە بەڵگە سەلمێنراوە ئەوەی سكۆت و كەسانی دیكەی هاوبیری ئەو ئاماژەی پێدەدەن لە راستیدا هیچ بنەمایەكی زانستیی نییە، چونكە راپۆرت و هەواڵەكان لە زاری سكۆتەوە رایانگەیاندووە، گوایە ئەو كەشتییە ئاسمانییەی ناونراوە (Alien Cube Ship)  قەبارەكەی 10 جار لە زەوی گەورەترە و رووبەری 63370 كیلۆمەتری داپۆشیوە و گوایە دوای روونتركردنی وێنەكە پەیكەری دەرەكیی ئەو تەنە بە بۆیەیەكی رەنگ سووریش داپۆشراوە! 

ئەگەرچی ئەم گرتەیە هی ئێستا نییە و دەگەڕێتەوە بۆ 2020-8-2، بەڵام لە لێدوانێكیدا، ئالیكس یەنگ ئین، زانای فیزیای فەلەكیی خۆر لە ئاژانسی (ناسا) دوا وەڵامی ئەو مشتومڕەی بە تەواوی دایەوە و لە تویتێكدا رایگەیاند، "ئەو چوارگۆشە رەشەی لەسەر رووی خۆر دەركەوتووە، یەكەمجار نییە، بەڵكو چەندین جار لەنێو گرتەكانی مانگی دەستكردی (SOHO) دا دەركەوتووە و تەنانەت لە ماوەی چەند رۆژێكدا، چەندینجار دووبارە بووەتەوە و دیاردەیەكی زۆر ئاساییە و بریتییە لە گرفتی ناسراو بە (بەلێشاو هاتنی گرتەی یەك لە دوا یەكەكان) كە بە كۆدی (SOHO / EIT) ئاماژەی پێدەدەن و بریتییە لە دۆخی لەدەستدانی بەشێك لە داتا یان هەڵەیەك لە چەند پێكسڵێكی نێو گرتەكە، نەوەك كەشتییەكی ئاسمانیی هاتوو بێت لە شارستانییەتێكی دیكەی هۆشمەندەوە."

(SOHO)  كورتكراوەی (Solar and Heliospheric Observatory) واتە (روانگەی خۆر و بەرگی دەرەكی)، مانگێكی دەستكردی هاوبەشی نێوان (ئاژانسی بۆشاییگەریی ئەورووپی – ESA) و (رێڤەبەرایەتی فڕین و بۆشاییگەریی نیشتیمانیی – NASA) یەو لە 1995.12.2 هەڵدراوەتە بۆشایی ئاسمان، لە ئایاری 1996 دەستبەكاربووە و لە دووریی یەک ملیۆن كیلۆمەتر لە زەوییەوە بەوردی روانگەی خۆر و چالاكییە ناوازەكانی دەكات، دەیان هەزار گرتە و داتای سەرسوڕهێنەری خۆری پێشكێش بە زانایانی فەلەكناس كردووە و بڕیارە تاوەکو ساڵی 2025 بەردەوامبێت.