یۆنان مافی پەنابەریی هەزاران کۆچبەری سووری و ئەفغانی هەڵدەوەشێنێتەوە

رووداو دیجیتاڵ

یۆنان دەستی کردووە بە هەڵوەشاندنەوەی مافی پەنابەریی هەزاران پەنابەری سووری و ئەفغانی، ئەوەش دوای ئەوەی حکومەتی ئەو وڵاتە رایگەیاند، شەڕ لەو دوو وڵاتە کۆتایی هاتووە و "ئارامن". هاوکات وەزیری کۆچی ئەو وڵاتە بە راشکاوی دەڵێت، لە وەرگرتنی هێزی کاردا وڵاتە مەسیحییەکانیان لە وڵاتە ئیسلامییەکان پێ باشترە.

دوای ئەوەی لە کانوونی یەکەمی 2024دا کۆتاییهاتنی شەڕی ناوخۆ لە سووریا راگەیێندرا، حکومەتی یۆنان لە شوباتی ئەمساڵەوە دۆسیەی 1200 پەنابەری سووری کردووەتەوە بۆ ئەوەی مافی پەنابەرییان لێ بسێنێتەوە. 

جگە لە سوورییەکان، پەنابەرانی ئەفغانستانیش هەمان مەترسییان لەسەرە، بەو پاساوەی کە تاڵیبان لە ساڵی 2021وە دەسەڵاتی گرتووەتە دەست و شەڕ نەماوە.

ئەنجێلیکی تیۆدۆرۆپۆلۆ، پارێزەر لە ئەنجوومەنی یۆنانی بۆ پەنابەران دەڵێت، ئەم رێکارانە زیاتر پیاوان دەگرێتەوە و ئاماژەیە بۆ تووندکردنی سیاسەتی یەکێتیی ئەورووپا بەرامبەر بە کۆچبەران.

ئاینی کۆچبەران دەبێتە پێوەر

سانۆس پڵێڤریس، وەزیری کۆچی یۆنان، لەبەردەم لیژنەیەکی پەرلەمانیدا بە راشکاوی باسی لە جیاوازیی ئاینی کردووە لە وەرگرتنی کۆچبەراندا. ئەو دەڵێت، "وڵاتانێک هەن کە بەهاکانیان لەگەڵ ئێمە یەکناگرێتەوە، ئەوەش بە پلەی یەکەم بەهۆی ئاینەوەیە، با روون بین؛ مەبەستم ئیسلامی تووندڕەوە."

وەزیری کۆچی یۆنان دەشڵێت، ئەوان لە گفتوگۆدان لەگەڵ وڵاتانی وەک جۆرجیا، فلیپین، ئەرمینیا و هیندستان بۆ هێنانی هێزی کار، چونکە ئەو وڵاتانە یان مەسیحین یان لە رووی ئاینییەوە بێلایەنن.

سزای تووند بۆ ئەوانەی ناگەڕێنەوە

یۆنان لە ئەیلوولی 2025ەوە تووندترین یاسای دیپۆرتکردنەوەی لەسەر ئاستی یەکێتیی ئەورووپا پەسند کردووە. بەگوێرەی یاساکە، ئەو کۆچبەرانەی داواکارییەکەیان رەتدەکرێتەوە، تەنیا دوو هەفتەیان لەپێشە بۆ ئەوەی خۆبەخشانە وڵات جێبهێڵن، ئەگەر نەڕۆن، بە 5 هەزار یۆرۆ سزا دەدرێن و رووبەڕووی 2 بۆ 5 ساڵ زیندانیکردن دەبنەوە لە کەمپە داخراوەکاندا.

هەروەها ئامێری چاودێری (GPS) دەخرێتە دەستیان بۆ ئەوەی بزاندرێت لەکوێن.

ئەم رێکارە نوێیانەی یۆنان لە کاتێکدایە کە یەکێتیی ئەورووپا ئامادەکاری دەکات بۆ جێبەجێکردنی "رێککەوتنی نوێی کۆچ و پەنابەری" لە مانگی داهاتوودا، کە تێیدا جەخت لەسەر تووندکردنی سنوورەکان و گەڕاندنەوەی خێرای ئەو کەسانە دەکرێتەوە، کە مافی پەنابەرییان وەرنەگرتووە.

لە یۆنان کە دەروازەی سەرەکیی کۆچبەرانە بۆ ئەورووپا، نزیکەی یەک ملیۆن کۆچبەری یاسایی هەن، کە زیاتر لە 137 هەزاریان مافی پەنابەرییان هەیە، بەڵام ئێستا زۆربەیان لەژێر مەترسیی دیپۆرتکردنەوەدان.