- - کۆمپانیای Take-Two بڕیاری دادگای بۆ ناچارکردنی مایکرۆسۆفت و دیسکۆرد بەدەستهێنا.
- - هەژمارێک بە ناوی Cyberleek دزەی بە زانیاری و ڤیدیۆ نهێنییەکانی GTA VI کردووە.
- - دادگە تاوەکو 4ـی ئەیلوولی بۆ مایکرۆسۆفت و دیسکۆرد دیاریکردووە بۆ رادەستکردنی زانیارییەکان.
- - بڕیارە یارییەکە لە 19ـی تشرینی دووەمدا بە فەرمی لە سەرانسەری جیهان بڵاوبکرێتەوە.
رووداو دیجیتاڵ
کۆمپانیای بڵاوکەرەوەی یارییە ڤیدیۆییە بەناوبانگەکەی جیهان (GTA VI)، بڕیاری دادگای بەدەستهێناوە بۆ ئەوەی هەردوو کۆمپانیای مایکرۆسۆفت و دیسکۆرد ناچار بکات زانیاریی ئەو کەسانەیان پێبدەن کە بەم دواییانە دزەیان بە ڤیدیۆ و زانیاریی نهێنیی یارییەکە کردووە.
دادگای فیدراڵی لە نیویۆرک، رەزامەندیی داوە کە کۆمپانیای (Take-Two)، کە خاوەنی کۆمپانیای (رۆکستار گەیمز)ـە، مافی خۆیەتی بزانێت کێ ئەو ڤیدیۆیانەی لەسەر ئینتەرنێت بڵاوکردووەتەوە، چونکە ئەمە پێشێلکردنی مافی خاوەندارێتییە.
هۆکاری دزەپێکردنەکان و هەڵوێستی 'Cyberleek'
ئەم زانیارییانە لەلایەن هەژمارێکەوە بە ناوی خوازراوی (سایبەرلیک - Cyberleek) بڵاوکراونەتەوە. ئەو کەسانەی لەپشت هەژمارەکەوەن دەڵێن ئامانجیان ئەوەیە شێوازی بازرگانیکردنی کۆمپانیاکانی بواری یارییە ئەلیکترۆنییەکان بۆ رای گشتی ئاشکرا بکەن؛ بەتایبەتی کە پێشتر رۆکستار رەخنەی لێگیرا چونکە دەیویست یارییەکە بە شێوەیەکی دیجیتاڵی و بە نرخێکی گرانتر بفرۆشێت.
"دزەپێکردنی ڤیدیۆکان زیانی گەورەی بە هەڵمەتی ریکلامکردنی سێ ساڵەی رۆکستار گەیاندووە"
هەرچەندە کۆمپانیاکە تاوەکو ئێستا قسەی لەسەر ئەم کێشەیە نەکردووە، بەڵام دزەپێکردنی ڤیدیۆکان بەردەوامن. تەنانەت رۆژی هەینی ڤیدیۆیەکی نوێ بڵاوکرایەوە کە تێیدا کارەکتەرێکی یارییەکە ئۆتۆمبێلێکی وەرزشی دەدزێت. ئەم دزەپێکردنانە زیان بەو هەڵمەتە گەورەیەی ریکلامکردن دەگەیەنن کە کۆمپانیاکە سێ ساڵە دەستیپێکردووە.
کاتی پەخش لەسەر نێتفلێکس و بڵاوبوونەوەی فەرمی
بڕیارە رۆژی 27ـی ئاب لەسەر نێتفلێکس بەرنامەیەکی تایبەت بۆ ناساندنی یارییەکە پەخش بکرێت، ئەوەش پێش ئەوەی یارییەکە بە فەرمی لە 19ـی تشرینی دووەمدا لە سەرانسەری جیهان بڵاوبکرێتەوە.
یاریی (GTA VI) کە چیرۆکەکەی لە ویلایەتی فلۆریدای ئەمریکاوە وەرگیراوە، زیاتر لە 13 ساڵە یاریزانانی خستووەتە چاوەڕوانییەوە، ئەوەش دوای سەرکەوتنە گەورەکەی بەشی پێشووی یارییەکە (GTA V).
دادگە داوای لە کۆمپانیای مایکرۆسۆفت (خاوەنی پلاتفۆرمی گیتهەب) و پلاتفۆرمی دیسکۆرد کردووە، زانیاری لەسەر سێ هەژماری گومانلێکراو و هەروەها هەموو ئەندامانی ئەو گرووپانە بدەن کە ڤیدیۆکانیان تێدا بڵاوکراوەتەوە. دەبێت هەردوو کۆمپانیاکە تاوەکو 4ـی ئەیلوول وەڵامی دادگە بدەنەوە.
