رووداو دیجیتاڵ
فەرماندەیی ناوەندیی هێزەکانی ئەمریکا (سێنتکۆم) رایگەیاند، هێزەکانیان بە سەرکەوتوویی شەپۆلێکی هێرشی ئاسمانییان بۆ سەر چەند ئامانجێکی سەربازی لە ناو خاکی ئێران ئەنجامدا.
رۆژی چوارشەممە، 2ـی ئەیلوولی 2026، سێنتکۆم لە راگەیێندراوێکدا ئاماژەی بەوە کرد، رۆژی 1ـی ئەیلوول هێزەکانی ئەمریکا هێرشیان کردووەتە سەر چەند ئامانجێکی سوپای پاسداران، لەوانەش بنکەکانی بەرگریی ئاسمانی، سیستمەکانی رادار، دامەزراوە دەریاییەکان، تواناکانی چاندنی مینی دەریایی و ناوەندەکانی پەیوەندیی سەربازی.
بەگوێرەی راگەیێندراوەکە، ئەم هێرشانە وەک وەڵامێک بووە بۆ هەوڵە نوێیەکانی سوپای پاسداران بۆ هێرشکردنە سەر کەشتییە بازرگانییەکان لە تەنگەی هورمز و هێرشکردنە سەر سەربازانی ئەمریکا لە ناوچەکەدا.
فەرماندەیی ناوەندیی هێزەکانی ئەمریکا ئاماژەی بەوەش کردووە، ئێستا زیاتر لە 50 هەزار سەربازی ئەمریکی لە ناوچەی رۆژهەڵاتی نێوەڕاستدا جێگیرکراون و لەوپەڕی وریایی و ئامادەباشیدان بۆ بەردەوامبوون لە جێبەجێکردنی ئەو ئۆپەراسیۆنانەی لەلایەن فەرماندەی گشتیی هێزە چەکدارەکانەوە (سەرۆکی ئەمریکا) رادەسپێردرێن.
ئەو راگەیێندراوەی سێنتکۆم لەکاتێکدایە، ئەمریکا شەوی رابردوو لە زنجیرە هێرشێکدا بۆسەر ئێران، چەندین ناوچەی لە باشووری ئەو وڵاتە بۆردوومانکرد کە زیانی گیانی و ئابووری لێکەوتووەتەوە. لەوانەش تۆڕی دابەشکردنی کارەبا لە چەندین ناوچەی پارێزگای هورمزگان کرایە ئامانج و بووە هۆی بچڕانی کارەبا لە دوورگەی قیشم و سیریک لە پارێزگای هورمزگان.
