رووداو دیجیتاڵ
سەرچاوەیەک لە نووسینگەی رەشاد عەلیمی، سەرۆکی ئەنجوومەنی سەرکردایەتیی یەمەن رۆژی دووشەممە بە ئاژانسی فرانس پرێسی راگەیاندووە، عەلیمی بە تەلەفۆن قسەی لەگەڵ دۆناڵد ترەمپ، سەرۆکی ئەمریکا کردووە و داوای پشتیوانیی واشنتنی کردووە لە دژی حووسییەکان.
سەرچاوەکە باسی لەوە کردووە، ترەمپ بەڵێنی پێشکێشکردنی هاوکاریی سەربازیی نەداوە و روونیکردەوە کە پەیوەندییە تەلەفۆنییەکە رۆژی یەکشەممە کراوە و مەبەست لێی نیشاندانی پشتیوانی بووە بۆ حکومەتی دانپێدانراوی یەمەن، دوای ئەوەی چەکدارانی حووسی لە هێرشێکی خێرادا تەواوی کەناراوەکانی دەریای سووری وڵاتەکەیان کۆنترۆڵکرد.
عەلیمی سەرۆکایەتیی ئەنجوومەنی سەرکردایەتیی یەمەن دەکات کە لەلایەن سعودیە پشتیوانی دەکرێت و لە دژی حووسییەکان شەڕ دەکەن.
ئەم داواکارییەی عەلیمی دوای هێرشە مووشەکییەکەی رۆژی شەممەی حووسییەکان هات بۆ سەر شاری ریاز، کە یەکەمین هێرشیان بوو بۆ سەر پایتەختی سعودیە لە ماوەی چەند ساڵی رابردوودا و بە پەرەسەندنێکی گەورەی سەربازی دادەنرێت.
میدیاکانی ئەمریکا بڵاویانکردەوە کە محەممەد بن سەلمان، شازادەی جێنشینی سعودیەش داوای لە ترەمپ کردووە هێرش بکاتە سەر حووسییەکان، کە لە مانگی تەممووزەوە چەندین جار هێرشیان کردووەتە سەر خاکی سعودیە.
هەروەها رۆژنامەی نیویۆرک تایمز باسی لەوە کرد، شازادەی جێنشینی سعودیە رۆژی یەکشەممە پەیوەندیی بە ترەمپەوە کردووە "تاوەکو جارێکی دیکە داوای لێبکات" یارمەتیدەر بێت لە بەرپەرچدانەوەی پێشڕەوییەکانی ئەو گرووپە؛ لە کاتێکدا ماڵپەڕی "ئەکسیۆس" پێشتر ئاشکرای کردبوو کە ترەمپ هەفتەی رابردوو داواکارییەکی هاوشێوەی سعودیەی رەتکردبووەوە.
هاوکات کەناڵی فۆکس نیووز رۆژی یەکشەممە بڵاویکردەوە، ترەمپ رایگەیاندووە، حووسییەکان رێککەوتوون لەسەر ئەوەی هێرش نەکەنە سەر ئامانجە ئەمریکییەکان.
ئێستا چەکدارانی حووسی دەستیان بەسەر ناوچە کەناراوییە ستراتیجییەکانی تەنگەی بابولمەندەبدا گرتووە، دوای ئەوەی لە دەست هێزەکانی حکومەتی یەمەنیان دەرهێنان کە لەلایەن ریازەوە پشتیوانی دەکرێن.
ئەم دەستکەوتە سەربازییانەی حووسییەکان هەژموونی ئێران و هاوپەیمانەکانی بەسەر ئەو دوو رێڕەوە ئاوییەدا بەهێزتر دەکات کە وڵاتانی کەنداو، بەتایبەت سعودیە وەک گەورەترین هەناردەکاری نەوتی خاو، پشتیان پێدەبەستن بۆ گواستنەوەی نەوتەکەیان.
لە مانگی تەممووزدا، ئاگربەستە لەرزۆکەکەی ساڵی 2022ـی نێوان حووسییەکان و حکومەتی یەمەن هەڵوەشایەوە، دوای ئەوەی گرووپەکە رێگەی بە فڕۆکەیەکی ئێرانی دا لە فڕۆکەخانەی سەنعا بنیشێتەوە، ئەوەش وەک یاخیبوونێک لە کۆنترۆڵی ریاز بەسەر ئاسمانی یەمەندا؛ ئەمەش بووە هۆی سەرهەڵدانی شەپۆلێکی نوێی هێرش و پێکدادان.
دواتر حووسییەکان گەمارۆی دەریاییان بەسەر سعودیەدا سەپاند و دەستیانکرد بە بەئامانجگرتنی کەشتییە بازرگانییەکان و خاکی ئەو وڵاتە.
