رووداو دیجیتاڵ
وێڕای ئەوەی ستیڤ ویتکۆف، نێردەی تایبەتی دۆناڵد ترەمپ لە شاری سانت پترسبۆرگ لەگەڵ ڤلادیمیر پووتین، سەرۆکی رووسیا کۆبووەوە و باس لە نزیکبوونەوە لە ئاشتی کرا، بەڵام هەردوو وڵات شەوێکی خوێناوییان لەسەر دەستی یەکدی بەڕێکرد و هێرشە ئاسمانییەکان بەردەوام بوون.
دیدارەکەی مۆسکۆ و پێشنیازی ئاشتی
دوای کۆبوونەوەکەی لەگەڵ ڤۆلۆدیمیر زیلینسکی، سەرۆکی ئۆکراینا لە ئۆسلۆ، ستیڤ ویتکۆف سەردانی پووتینی کرد و باسی لە دەستپێکردنەوەی دانوستاندنی سێقۆڵیی ئەمریکا، رووسیا و ئۆکراینای کرد.
کرێملین رایگەیاند، ئامادەن لە نێوەڕاستی مانگی تشرینی دووەمدا، واتە دوای هەڵبژاردنەکانی ئەمریکا، بەشداری لە دانوستاندندا بکەن. ترەمپ دوای ئەم دیدارە گوتی، ئەمە "باشترین" دەرفەتە بۆ کۆتاییهێنان بە جەنگەکە.
هەروەها باس لەوە کرا کە ئەگەر هەیە لە مانگی داهاتوودا لە شاری شێنزن لە چین، لووتکەیەکی مێژوویی لە نێوان ترەمپ، پووتین و شی جینپینگ، سەرۆکی چیندا بەڕێوەبچێت.
وەکو نیشانەیەکی نیازپاکی، پووتین بڕیاری دا ستیڤن هاباردی تەمەن 70 ساڵ، کە مامۆستای خانەنشینکراوی ئینگلیزی بوو و پێشتر لە رووسیا دەستگیر کرابوو، ئازاد بکات و ترەمپش لە بەرامبەردا سزاکانی سەر رووسیای دواخست.
بەردەوامیی هێرشەکان بۆ سەر مۆسکۆ و کیێڤ
سەرەڕای ئەم هەوڵە دیپلۆماسییانە، هێرشەکان نەوەستان. سەرۆکی شارەوانیی مۆسکۆ رایگەیاند، سوپای ئۆکراینا شەوی رابردوو 630 درۆنی ئاراستەی مۆسکۆ و ناوچەکانی دەوروبەری کردووە، کە زۆربەیان تێکشکێنراون، بەڵام بوونە هۆی برینداربوونی دوو کەس.
لە بەرامبەردا، رووسیا بۆردوومانی کیێڤی پایتەختی ئۆکراینای چڕکردەوە. سەرۆکی شارەوانیی کیێڤ گوتی، بەهۆی هێرشەکانەوە 15 کەس بریندار بوون و زیان بە ژێرخانی میترۆ لەسەر پردی پیڤیدنی گەیشتووە.
هێرشەکانی رووسیا لە سەرانسەری ئۆکراینا لانیکەم 4 کەسیان کوشت، لەوانە دوو کەس لە پایتەخت و ژن و مێردێکیش لە هەرێمی خارکیڤ.
زیلینسکی لەبارەی دەستپێکردنەوەی گفتوگۆکانەوە گوتی: "لایەنی ئەمریکی پێشنیاز دەکات ئەم کۆبوونەوەیە لە زووترین کاتدا رێکبخرێت و ئێمەش پشتگیریی دەکەین." بەڵام پووتین هێشتا رەتیدەکاتەوە راستەوخۆ لەگەڵ زیلینسکیدا کۆببێتەوە و جەخت لەسەر ئەوە دەکاتەوە کە دەبێت بەشێکی زۆری خاکی رۆژهەڵاتی ئۆکراینا کۆنترۆڵ بکات.
