رووداو دیجیتاڵ
لە دوورگەی گران کەناریا لە باشووری ئیسپانیا تەم کۆدەکرێتەوە و بۆ ئاودێری بەکاردەهێندرێت، پڕۆژەکە لە ساڵێکدا نزیکەی 220 هەزار لیتر ئاو دەست دەخات؛ پرۆسەکەش لەڕێگەی ژمارەیەکی زۆر بۆکسەوە دەکرێت کە بە تۆڕ رووپۆش کراون.
گوستاڤۆ ڤێرا، ئەندازیار دەڵێت، "ئێمە تەمەکە لەوێ دەپاڵێوین و دواتر لەنێو بەرمیلدا هەڵیدەگرین، هیوادارین بتوانین خزمەتی دارستانەکەی پێبکەین."
ریکاردۆ، 10 ساڵ پێش ئێستا ئەو پڕۆژەیەی دروستکردووە؛ دوای ئەوەی بەهۆی گۆڕانی کەشوهەواوە، دارستانەکە مەترسیی وشکبوونی لەسەر بوو، دەستی بە جێبەجێکردنی بیرۆکەکەی کرد.
ریکاردۆ گیل، دامەزرێنەری پڕۆژەکە دەڵێت، "دەتوانیت جێگیرکردنەکە لەوێ ببینیت. 18 یەکەی کۆکردنەوەی تەم لەوێ هەن و هەموویان لەسەر گردەکەن بۆئەوەی تەمەکە کۆبکەنەوە."
لە تەواوی ساڵەکەدا لەڕێگەی ئەو پڕۆژەیەوە نزیکەی 220 هەزار لیتر ئاو دەستدەخەن، ئەوەش بڕێکی باشە بۆ ئاودانی درەختەکان، ریکاردۆ دەڵێت، "ئاوەکە بۆ خواردنەوەش دەشێت."
