هەفتەی نیشاندانی فیلمی کوردی لە سوێد بەڕێوەدەچێت

ئاسایش دانش لەبارەی نمایشەکە دەڵێت "لەشاری بۆرۆس ، یەکەمین ھەفتەی نمایشی فیلمی کوردی ئەنجامدەدەین، ئەمەش دوای ھەوڵێکی زۆر و دروست کردنی پەیوەندی لەگەڵ بەڕێوەبەرایەتی سینەما لە ھەر سێ شارەکانی ھەرێمی کوردستان، کە سەر بە وەزارەتی ڕۆشنبیری و لاوانی حکومەتی ھەرێمی کوردستانن". 

سەرپەرشتیاری نمایشەکە دەشڵێت" توانیومانە ئەم فیلمانە کۆ بکەینەوە، کە بەهێز و پڕ مانان، نمایشەکەش لەڕۆژانی ٧ تا ٩ ئەم مانگە لە ھۆڵی کتیبخانەی گشتی شاری بۆرۆس نمایش دەکرێن، هەروەها چەندین ھونەرمەندی کوردی تاراوگە، بانگهێشتکراون و ئامادە دەبن".

ئاسایش دانش لەبارەی بودجەی ئەم نمایشە دەڵێت"ھاتنی ھونەرمەندانی تاراوگە و ھونەرمەندانی کوردستان، بە چاپگەیاندن ودروست کردنی پۆستەر و دەلیل و شۆینی حەوانەوەی ھونەرمەندان ومیوانان، پێویستی زۆری بە ھاوکاری دارایی ھەیە، تاوەکو ئێستا ھیچ لایەن و جێگایەکی فەرمی ھاوکاریان نەکردووین. ئێمە لۆگۆی حکومەتی ھەرێمی کوردستانمان لەسەر ھەموو پۆستەر و ریکلامەکانمان داناوە، هەروەها کۆمۆنی شاری بۆرۆس و ڕێکخراوی ئا،بی،ئێف ، ئەرکی دابینکردنی ھۆڵی سینەما بۆ نمایش کردنی فیلمەکان  لە ئەستۆگرتووە، ئەوەی تا ئێستاش خەرجکراوە لە پارەی گیرفانی خۆمان بووە".