رووداو- ئیستەنبوڵ
لە تەمەنێكی بچووكەوە ئاشنای میوزیك بووە، بەهۆی هاندانی بەردەوامی باپیرەی لە كاتی كۆبوونەوەی خانەوادەكەیان، ئەو بوێرییەی لە گۆرانیگوتندا لە باپیرییەوە وەرگرتووە. سەرەتا بەشێوەیەكی ناپرۆفیشناڵ لە قۆناغی سەرەتایی قوتابخانەدا دەستی بە گوتنی گۆرانی كردووە. پاشان دەستی بەخوێندنی هونەرە جوانەكان و خوێندنی ئەكادیمیانە و پرۆفیشناڵ كردووە. لە بۆنە خۆش و ناخۆشەكاندا، لە ئاهەنگگێڕان و ماتەمەكاندا، وەرگێڕی هەست و سۆزەكان بووە لە رێگەی هونەرەكەیەوە. گولسێڤەن مەدار لە هەڤپەیڤینێكدا وەڵامی پرسیارەكانی (رووداو) دەداتەوە.
رووداو: بە چەند زمان گۆرانی دەڵێیت؟
گولسێڤەن: من مەقامبێژی میوزیكی كلاسیكم. چەندین ئەلبووم و گۆرانیم لەسەر شانۆیەكاندا پێشكەش كردووە، بێگومان بەدیالێكتە جیاوازەكانی كوردی گۆرانیم گوتووە. لەگەڵ ئەوەشدا بەزمانەكانی توركی، ئەرمەنی، عەرەبی و عیبری مەقامم چڕیوە، بەڵام بەشێوەیەكی گشتی بەزمانی دایك واتە بەزمانی كوردی بەرهەمەكانم تۆمار كردووە و پێشكەشی هەوادارانم كردووە و بەردەوامیش دەبم لەسەر ئەم كارە.
رووداو: كورد لە رووی میلۆدییەوە زۆر دەوڵەمەندە، چ بكرێت بۆ ئەوەی ئەو گەنجینەیە لەناو نەچێت؟
گولسێڤەن: هەر ناوچەیەك میلۆدی تایبەت و ریتمی میوزیكی تایبەت بەخۆی هەیە. جگە لەمەش دیالێكت و شێوەزارەكانیش یەكێكە لە بەها زۆر گرنگەكان و بەرهەمە هونەرییەكانیشیان زیاتر دەوڵەمەند و هەمەچەشن كردووە، هەر بەهۆی ئەو فرە چەشنەییەوە، هەر ناوچەیەك بەرهەم و ستایلی میوزیكی تایبەت بەخۆی بنیاتناوە. مەقامی ناوچەی كۆچگری كە دواتر لەلایەن عەلەوییەكانەوە دەوڵەمەند كراوە، بەمیلۆدی و ستایلی تایبەت بەخۆیان ناسراون كە بەهۆیەوە میتۆلۆژی و رووداوە مێژووییەكانیان دەكەنە باسی مەقامەكە. گرنگە كوردیش داستانەكانی خۆی لە رێگەی ریتمێكی میوزیكی تایبەتی خۆیەوە، بڵاوبكەنەوە.
رووداو: جگە لە میوزیك لە بوارەكانی دیكەی هونەر كار دەكەی؟
گولسێڤەن: لە ساڵی 2012 لە شانۆی سیێتەر راست و لە شانۆی خەڵك لە ئامەد، بەشێوەیەكی هاوبەش لەگەڵ شانۆكارە بیانییەكان لە شانۆگەریی "هاملێت بەكوردی" رۆڵی ئۆلیڤیام گێڕا، ئەو رۆڵەی كە بینیم، شیعرەكانی شێخمووس سەفەر و میوزیكی مەقامەكان تایبەت بوون بەخۆم. هەروەها میوزیكەكانی تایبەت بە نواندنەكانی رۆژدا و عەلی تەكباش، خۆم دامڕشت و مەقامەكانیش بەپێی ریتمی میوزیكی ناوچەكەی خۆم هەڵمبژارد و بەمەش تەواوی شانۆگەرییەكە بە ریتمێكی تایبەتی میوزیكی كوردییەوە رەنگدانەوەیەكی ناوازەی هەبوو. لە كۆی پێنج بەرهەمی میوزیكی كوردی، سێ بەرهەمی میوزیكی تایبەت بەناوچەی كۆچگری تێدا بوو.
رووداو: چۆن دەڕوانیتە تێكەڵكێشكردنی میوزیكی كوردی و جیهانی؟
گولسێڤەن: جیاوازبوونی ریتمی میوزیكی كوردی لە میوزیكی كلاسیك و جیهانی، تایبەتمەندییەك دەبەخشێت و جیاوازی لە رووی ئامێرەكانیشەوە دروست دەكات. لەگەڵ ئەوەشدا ئەم ریتمە نوێیە لە میوزیكی كوردیدا بەدی دەكرێت. گرنگ ئەوەیە لە مەقامەكاندا نەریتە كۆنەكە پارێزراو بێت بۆ درێژەدان بەشێوازە كولتوورییەكەی. بەمەش لە داهاتوودا بەتایبەتی لە میوزیكی هاوچەرخدا دەكرێت كورد ببێتە خاوەن ریتم و ستایلی تایبەتی خۆی، یەكێك لە هیوا و ئاواتەكانم ئەوەیە، لە بازنەی نەریتە كلاسیكییەكە دەرنەچم و لەهەمانكاتیشدا تێكەڵاوی لاساییكردنەوەی كولتووری دیكەش نەبم، بۆ ئەوەی بتوانم لەم نێوەندەدا میلۆدییەكی خۆماڵیی سادە دەربهێنم و رایەڵێكی وابەستەی جیهانی دروست بكەم بەناوی كورد. ئەگەر ئەمەم پێ بكرێت وەك كودەتایەكی هاوچەرخ دەبێت لە مێژووی بواری میوزیكدا.
گولسێڤەن مەدار كێیە؟
گولسێڤەن مەدار، لە ساڵی 1981 لە شارۆچكەی زارا سەر بە پارێزگای سێواس لە باكووری كوردستان لەدایكبووە، یەكەم گۆرانی سۆڵۆی لە قۆناغی سەرەتایی چڕی. لەسەر میوزیكی ناوچەی زارا و كولتووری مەقامی ئەو ناوچەیە راهێنانی زۆری كردووە، هەروەها شارەزاییەكی زۆری لە مەقام و گۆرانی و سترانەكانی ناوچە جیاوازەكاندا هەیە. لە ساڵی 2000 لە بەشی دەنگ و مەقامەكان لە كۆلێژی هونەرە جوانەكانی سەر بە زانكۆی تەكنیكی لە ئیستانبوڵ دەستی بەخوێندن كرد. ئێستا مامۆستای زانكۆیە و وانەی مەقام دەڵێتەوە و راهێنان لەسەر شێوازی چۆنێتی كۆنترۆڵكردنی هەناسە وەرگرتن و هەناسەدان دەكات. ماوەیەك لە زانكۆی هالیچ مامۆستای هونەرە جوانەكان بووە. لە ساڵی 2005 لە پێشبڕكێی مەقامبێژی لە كەناڵ دی لەسەر ئاستی توركیا سێیەم بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ