رووداو - سلێمانی
"ئەم شانۆییە رەنگدانەوەی كێشەكانی كۆمەڵگەكەمانە، راستە خۆشمان هەست بە كێشەكانمان دەكەین، بەڵام هەندێجار هەتا ئەم جۆرە شانۆییانە نەبینین نازانین لە چ دۆخێكداین".
ئاشتی حەكیم ئامادەبوویەكی شانۆیی "تەپڵ و بەرد" وایگوت.
ئەو شانۆییە بەرهەمێكی مۆنۆدرامییە كە هونەرمەند شوان عەتوف بە تەنیا وەكو ئەكتەر و دەرهێنەر كاری تێدا كردووە، شانۆگەرییەكە لە رۆژی 15/4/2016 وە لە هۆڵی كۆمەڵەی هونەرەجوانەكان لە شاری سلێمانی نمایش دەكرێت، شوان دەڵێت هەتا بینەر هەبێت لە نمایشكردن بەردەوام دەبێت.
لەگەڵ نزیكبوونەوەی كاتی پێشكەشكردن، وردە وردە ئامادەبووان روو لە هۆڵەكە دەكەن. هەر لەگەڵ كرانەوەی پەردەی شانۆ، بێدەنگی باڵ بەسەر هۆڵەكەدا دەكێشێ. بۆ زۆربەی دیالۆگەكانی شانۆگەرییەكە ئامادەبووان چەپڵە لێدەدەن، یان پێدەكەنن. یانیش ئاخ هەڵدەكێشن.
نێوەڕۆكی شانۆگەرییەكە پەیوەستە بەو رووداوانەی لەدوای راپەڕینی بەهاری 1991ی خەڵكی كوردستانەوە كەڵەكە دەبن.
شانۆگەرییەكە بە چیرۆكی گەنجێكی هەژار دەستپێدەكات كە عاشقی كچێكی دەوڵەمەند دەبێت، بەڵام كچەكە لەبەر هەژارییەكەی شووی پێناكات، ئیدی گەنجەكە سەری خۆی هەڵدەگرێت و دەچێتە ئەوروپا. لەم ساڵانەی دواییدا كە دەگەڕێتەوە كوردستان، دەبینێ خەڵك بەرد دەگرنە دەسەڵاتی كوردی.
ئاشتی حەكیم، كە زۆر بە دیققەتەوە گوێی لە شوان گرتبوو، بۆ زۆربەی قسەكانی بە زمانی جەستە كاردانەوەی نیشان دەدا، پێدەچوو چێژێكی زۆری لە شانۆگەرییەكە وەرگرتبێ. ئەو گوتی "لە رێگەی ئەم شانۆگەرییەوە تێدەگەین ئەو گەنجانەی كۆچ دەكەن تینووی هەندێك شتن كە لێیان قەدەغە كراوە، كاتێكیش دەچنە دەرەوە ناتوانن لەگەڵ كولتووری بێگانە هەڵبكەن و دەگەڕێنەوە".
بەشێكی دیكە لە ئامادەبووان شانۆییەكەیان وەكو شانۆییەكی سیاسی ناوبرد كە دەیەوێت چیرۆكی شكستخواردنی میللەتێك بگێڕێتەوە، بە گوتەی رامیار ئەحمەد "لە شانۆییەكەدا دەردەكەوێت بەشێكی زۆری ئەو شكستە چەندی بەهۆی هێزە نێودەوڵەتییەكانەوە بووبێت، ئەوەندەش بەهۆی سیاسییەكانی خۆمانەوە بووە".
بەڕای هێدی عەلی، خوێندكاری بەشی شانۆی پەیمانگەی هونەرەجوانەكانیش شانۆییەكە توانیویەتی پەیامی خۆی بگەیەنێت، چونكە لەڕێگەی هونەرەوە باسی رووداوەكانی ئەمڕۆی كردووە و بەشێوەیەكی هونەری رەخنەی لە سیاسییەكان گرت.
"ئەم شانۆییە پێی دەڵێن شانۆی تەنفیسی، شانۆكار هەوڵ دەدات هەناسەیەك بدات و خۆی بەتاڵ بكاتەوە لەو كارەساتانەی لەگەڵ تێپەڕینی رۆژگار لەگەڵیان دەژی"، ئەوە قسەی ئاسۆ عومەر سوارەی ئەكتەرە. ئاسۆ دەڵێت لەم شانۆییەدا بەپێچەوانەی شانۆییەكانی دیكەوە سوود لە دەقێكی پێشتر وەرنەگیراوە، بەڵكو دەقەكە بابەتەكانی رۆژانەیە كە هەموو تاكێك لەگەڵیدا دەژی.
ئاسۆ هەروەها دەڵێت "لەو جۆرە شانۆییانەدا كارێك دەكرێت ئەكتەر و بینەرەكە ئاوێتەی یەكدی دەبن و هەردووكیان لەو بابەتانە خۆیان خاڵی دەكەنەوە، هەموو پەیامێكی هونەری چێژ و مەعریفەی خۆی هەیە، بەڵام گرنگە ئەكتەرەكە بتوانێت بەو چێژە، مەعریفەیەك بدات".
شانۆییەكە مۆنۆدرامی و جددیش بوو، بەڵام هەندێجار هاوتای بەرهەمێكی كۆمیدی، ئامادەبووانی دەهێنایە پێكەنین و چەپڵەیان لێدەدا. ئاسۆ دەڵێت "هەموو شانۆییەك جدییە و كۆمیدیاش كارێكی قورس و جددییە، بەڵام ژانرەكانیان بۆ دەربڕین جیاوازن".
شوان عەتوف كارەكتەر و دەرهێنەری شانۆییەكە لەبارەی هەڵبژاردنی ناوی تەپڵ و بەرد بە (رووداو)ی گوت "تەپڵ و بەرد چیرۆكەكە بەرەوپێش دەبەن و پەیاممان بۆ دروست دەكەن، بەرد وەكو بەردی سەر گۆڕەكەی عەبەیە كە لە ئەوروپا خۆی دەكوژێ و تەپڵیش هێمایە بۆ ئەوەی عەبە بەندبێژ بوو. جگە لەوەش ئەو دوو ناوە بانگەشەیەكی باشیشن بۆ هاتنی خەڵك بۆ شانۆییەكە".
وەك شوان گوتی، شانۆییەكە یادەوەرییەكانی دوای راپەڕین دەگێڕێتەوە، بەتایبەتیش چركەساتی شەڕی ناوخۆ "خۆم شایەتحاڵێكی شەڕی نێوخۆم و پێموایە ئێستاش ئەو شەڕە تەواو نەبووە و لەزۆر شوێن وەك ئەوەیە شەڕی ناوخۆ مابێت، بەم دواییەش كۆچكردنی گەنجان بۆ دەرەوە دەستی پێكردەوە لە كاتێكدا گەنج تاكێكی گرنگی كۆمەڵگەیە و پێویستی بە ژیانە".
لەهەندێك لە خۆپیشاندانەكانی ئەم دواییەی كوردستاندا دروشمی "بڕووخێ" بۆ دەسەڵاتی كوردی بەرز كرایەوە، شوان لە شانۆییەكەدا و لە قسەكانیشیدا بۆ (رووداو) رەخنەی لەو دروشمە گرت و گوتی "مەنتقی تێدایە خۆپیشاندان بۆ گۆڕانكاری بكەیت، هەموو چین و توێژەكان بڵێن بڕووخێ! لە كاتێكدا پێویستە هەموو چین و توێژێك پەیامەكانی خۆیان بزانن و بشزانن ئاڕاستەی كێی دەكەن و بە فریوی سیاسییەكان هەڵنەخەڵەتێن، بۆیە لە كۆتایی شانۆییەكەشدا بە كۆمەڵگە دەڵێم ورە بە خۆت بدەرەوە و مێشكت بجوڵێنە و بزانە لە كاتی هەڵبژاردنەكاندا دەنگ بە كێ دەدەی".
هۆڵی كۆمەڵەی هونەرەجوانەكان نزیكەی 200 كورسی هەیە، بەپێی ئەو ئامارەی لەلایەن ستافی شانۆییەكەوە دراوە بە (رووداو)، لە ماوەی پێنج رۆژی نمایشدا نزیكەی دوو هەزار كەس ئامادەی بوون كە زۆربەیان گەنج بوون، هێدی عەلی خوێندكاری پەیمانگە گوتی "راستە زۆربەی ئامادەبووان گەنجن، هەندێكیان بۆ بینینی نواندنەكەی شوان عەتوف هاتوون بەهۆی بەرهەمەكانی پێشترییەوە".
شوان دڵخۆشە بە ئامادەبوونی گەنجان لە نمایشەكەیدا "زۆربەی بینەرەكان گەنج بوون، چونكە نێوەڕۆكی شانۆییەكە باسی حەقیقەت و چیرۆكی دڵشكاندنی ئەوانە، منیش لە بنەڕەتدا دەمەوێت گەنج ئامادە بێت".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ