رووداو دیجیتاڵ
شێوەکارێکی رۆژهەڵاتی کوردستان وێنەی کەسایەتییە هونەری و ئەدەبییەکانی کوردستان لەسەر دیوارەکانی شاری بانە دەکێشێت. لەسەر دیوارەکانی شەقامی کەمەربەندی نێو شاری بانە، وێنەی چەندین شاعیر، نووسەر و گۆرانیبێژی کورد کێشراون.
لە یەکێک لە وێنەکاندا، وێنەی چوار کەسایەتیی ناسراوی کورد کە هەرکامیان لە پارچەیەکی کوردستانن، پێکەوە کێشراوە کە ئەوانیش هەژار موکریانی، شێرکۆ بێکەس، جوان حاجۆ و یەڵماز گونەین.
هەروەها لە تابلۆیەکی دیکەدا وێنەی هونەرمەندان حەسەن زیرەک و عەباس کەمەندی کێشراوە.
وێنەکان لەلایەن ئارام مەجیدزادە، شێوەکاری خەڵکی بانە کێشراون. ئەو هونەرمەندە تەمەن 39 ساڵانە، 15 ساڵە کاری کێشانەوەی وێنە لەسەر دیوار دەکات و وێنەی کەسایەتییە ئەدەبی و هونەرییەکانی کوردستان بێ بەرامبەر و لەسەر تێچووی خۆی دەکێشێت.
شێوەکارێکی رۆژهەڵاتی کوردستان وێنەی کەسایەتییە هونەری و ئەدەبییەکانی کوردستان لەسەر دیوارەکانی شاری بانە دەکێشێت. لەسەر دیوارەکانی شەقامی کەمەربەندی نێو شاری بانە، وێنەی چەندین شاعیر، نووسەر و گۆرانیبێژی کورد کێشراون
— Rudaw (@Rudawkurdish) September 1, 2023
زانیاریی زیاتر:https://t.co/HuCMaphiQV pic.twitter.com/Qx8piKPMGc
وێنەکان سەرنجی دانیشتووانی شاری بانە و گەشتیارانیان راکێشاوە و بە گوتەی ئەو دووکاندارانەی شوێنی کارکردنیان لە نزیک وێنەکانە، رۆژانە خەڵکێکی زۆر وێنە لەگەڵ وێنەی ئەو کەسایەتییانە دەگرن.
ئارام مەجیدزادە سێ مانگە دەستی بە کێشانی ئەو وێنانە کردووە و بڕیارە لە چەندین شوێنی دیکەی نێو شاری بانە وێنەی هونەرمەندان عەلی مەردان، محەممەد ماملێ و مەزهەر خالەقی بکێشێت. هەروەها پلانی داناوە وێنەی کەسایەتییە ئەدەبییەکانی شاری بانە وەکو د. ئیبراهیم یونسی، وەرگێڕی ناسراوی کورد و هەروەها عەتا نەهایی، نووسەر بکێشێت.
