لەنێو بازاڕی قەرەباڵخی رانیە، دەنگی مەکینە کۆنەکەی عەبدوڵڵا ساڵح، پیاوێکی تەمەن 75 ساڵ، بۆ ماوەی 47 ساڵە دەبیسترێت. ئەو بە پیشەی پینەدۆزی بژێوی خێزانێکی 12 کەسی دابین کردووە.
مام عەبدوڵڵا، دەڵێت، کارەکەی ئاسان نییە و زۆرجار دەست و پەنجەکانی بریندار بوون، بەڵام هیچ کام لەمانە ساردیان نەکردووەتەوە. ئەو دەڵێت: "تاوەکو دەمرم، دەمەوێت لێرە کار بکەم و نان بۆ خێزانەکەم پەیدا بکەم."
ئەو پینەدۆزە هێشتا کڕیارێکی زۆری هەیە و خەڵک بۆ چاککردنەوەی جانتا و پێڵاوەکانیان رووی تێدەکەن. مام عەبدوڵڵا دەڵێت: "کوڕەکانم حەزیان لەم پیشەیە نییە، بەڵام من بەم تەمەنەوە بەردەوامم و تاوەکو هێزم تێدابێت، دەستبەرداری نابم."
