دەربارە
کەڤین حوسێن
رووداو - هەولێر
بینینی ئۆتۆمبێلی "بەرازیلی" فۆڵکسواگن لەسەر شەقامەکانی هەولێر و شارەکانی دیکەی هەرێمی کوردستان، بەشێكە لە یادەوەرییەکانی ساڵانی هەشتاکان و نەوەدەکان بۆ خەڵكی هەرێمی کوردستان. سەرەڕای ئەوەی زیاتر لە 40 ساڵ بەسەر بەرهەمهێنانیاندا تێپەڕیوە، هێشتا هۆگران و ئارەزوومەندانی ئەم ئۆتۆمبێلە کلاسیکە ماون و هەندێکیان وەک هێمایەکی زیندووی مێژووی شارەکانیان سەیری دەکەن.
ئۆتۆمبێلی بەرازیلی لە سەردەمی خۆیدا یەکێک بوو لە خواستەکانی زۆربەی خێزانەکانی کوردستان. ئێستا تەنانەت ئەو گەنجانەی لە سەردەمی باو بوونی ئەو ئۆتۆمبێلەدا لەدایک نەبوون، بوونەتە هۆگری.
هەڤاڵ قاسم، گەنجێکی تەمەن 29 ساڵانە دەڵێت، "تەمەنم شەش ساڵ بوو کاتێک لە رێگەی براکەمەوە فێری لێخوڕینی ئۆتۆمبێلی بەرازیلی بووم. لە ساڵی 2016ـەوە بەردەوام ئەم ئۆتۆمبێلەم پێبووە. ئارەزووی دەنگی تایبەتی ئێکزۆزەکەی دەکەم، ئۆتۆمبێلێکی پتەو و کلاسیکە و ناتوانم دەستبەرداری ببم."
زرار محەممەد، فیتەرە و خاوەنی بەرازیلییەکی مۆدێلی 1985ـە، دەڵێت "ئەم ئۆتۆمبێلەم لە هەموو ئۆتۆمبێلە نوێیەکان پێخۆشترە. بۆ کاری رۆژانەم بەکاریدەهێنم و بۆ هەموو شوێنێک پێیدەچم و هیچ کێشەیەکی بۆ دروست نەکردووم."
نەریمان بەرازیلی کۆکەرەوەی خاوەن و ئارەزوومەندانی ئۆتۆمبێلی بەرازیلی لە هەرێمی کوردستان
نەریمان حوسێن، بە نەریمان بەرازیلی ناسراوە و وەستایەکی شارەزای چاککردنەوەی ئەم جۆرە ئۆتۆمبێلەیە، توانیویەتی خاوەنەکانیان لە گرووپێکی تایبەتدا کۆبکاتەوە.
نەریمان حوسێن، بە رووداوی گوت، "من سەرپەرشتیی گرووپێک دەکەم کە لە 55 ئۆتۆمبێلی بەرازیلی پێکدێت لە شارەکانی هەولێر، بەغدا، کەرکووک و مووسڵ. بەرازیلی ئۆتۆمبێلێکی زۆر خۆڕاگرە؛ لە سەردەمی قاچاخچێتی و شۆڕشی کوردیدا خزمەتێکی زۆری کردووە، بەتایبەتی رەنگە سوورەکەی کە بووەتە سیمبولی ئەو سەردەمە."
