هەڵەیەک روویدا! دووبارە هەوڵبدە
بووڵتەنی نوورۆژ. وێنە: رووداو
رووداو - تەندروستی
پسپۆڕێکی نەخۆشییەکانی خانمان و منداڵبوون رایدەگەیێنێت، بەرکەوتنی ژنی دووگیان بە هەوای پیسبوو و مادە کیمیاییە زیانبەخشەکان لە سەرەتاکانی دووگیانیدا، کاریگەریی درێژخایەن و مەترسیدار لەسەر کۆرپەلە دروستدەکات.
رۆژی دووشەممە 5-6-2023 هاوتا لەگەڵ رۆژی جیهانیی ژینگە، دکتۆر شەیما خدر لە بووڵتەنی نوورۆژدا باس لە کاریگەرییەکانی پیسبوونی ژینگە لەسەر خانمانی دووگیان و کۆرپەلەکانیان دەکات و دەڵێت: کاریگەریی لەسەر هەموو کەسێک هەیە بەتایبەت ژنی دووگیان و کۆرپەلەکانیان.
دکتۆر شەیما خدر سوورچی، پسپۆڕی نەخۆشییەکانی خانمان و منداڵبوون دەریدەخات، پیسبوونی ژینگە دەکرێت ببێتەهۆی 'رەبۆ، هەناسەتەنگی، لەبارچوون و پێشوەختە لەدایکبوونی منداڵ'.
پسپۆڕەکە ئاماژە بە مادە زیانبەخشەکانی نێو ژینگەی پیسبوو دەکات وەکو 'کاربۆن، نایترۆجین و دوانەئۆکسیدی کاربۆن' و دەشڵێت: خانمانی دووگیان هەڵیدەمژن و دەچنە نێو خوێنییەوە بەمەش دەگوازرێتەوە بۆ کۆرپەلە.
تەنانەت پسپۆڕەکەی خانمان و منداڵبوون باس لە مادە پاککەرەوە کیمیاییەکانی نێو ماڵ و مادەکانی جوانکاری دەکات و رایدەگەیێنێت، هاوشێوەی دووکەڵی کارگە و ئۆتۆمبێلەکان مادەی زیانبەخش و پیسکەری ژینگەیان تێدایە و پێویستە خانمانی دووگیان لە بەکارهێنانیان ئاگاداربن.
بە گوتەی دکتۆر شەیما، ئەو کۆرپانەی هەوا و ژینگەی پیس کاری لێ کردوون زیاتر دووچاری نەخۆشییەکانی دڵ و هەوکردنی سییەکان دەبنەوە، ئاشکراشی دەکات کە مەترسیی تووشبوون بە نەخۆشییە سکماکییەکانیان لەسەر زیاددەبێت بەتایبەت ناڕێکیی پەلەکان و کۆئەندامی دەمار یاخود شەقبوونی لووت و لێو.
لە بارەی رێگەکانی خۆپارێزیی ژنی دووگیان لە کاریگەرییە نەرێنییەکانی پیسبوونی ژینگە و مادە کیمیاییە زیانبەخشەکان؛ دکتۆر شەیما سوورچی گوتی، لەکاتی بەرکەوتن و تێکەڵاوبوونیان لەگەڵ ئەو مادانە، دەتوانن دەمامک یاخود دەستکێش بەکاربهێنن، هەروەها رێنوێنیشیان دەکات کە ''بەهیچ شێوەیەک لە سەرەتاکانی دووگیانیدا بۆیەی قژ بەکارنەهێنن''.
پسپۆڕەکە روونی دەکاتەوە، بۆیەکانی قژ مادەی کیمیایی زیانبەخشیان تێدایە و دەشێت بۆ کۆرپەلە بگوازرێنەوە بۆیە دەڵێت: ''لە مانگەکانی سەرەتای دووگیانی بەهیچ شێوەیەک نابێت بەر پێستی ژنی دووگیان بکەون، چونکە دەمژرێن و دەگوازرێنەوە بۆ کۆرپەلە''.
لە کۆتاییدا ئەم پسپۆڕە گوتی، دەرمانی ناپێویست و ماوە بەسەرچوو یاخود مادە پارێزەرەکانی نێو خۆراک دەشێت هۆکاربن بۆ ناڕێکیی تەندروستیی کۆرپەلە، ''دایکانی دووگیان دەبێت هەمیشە ئاگاداری شێوازی ژیانیان بن''.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ