رووداو - تەندروستی
توێژینەوەیەکی نوێ لە دانیمارک دەریدەخات، مادەی سیماگلوتایدی نێو دەرمانەکانی کێشدابەزاندن دەکرێت هۆکاربن بۆ کوێربوونی لەناکاو.
توێژینەوەکە لە زانکۆی باشووری دانیمارک لەسەر 17 هەزار کەس کرا و دەرکەوت، ئەگەری تووشبوون بە کوێربوونی لەناکاو 1٪ زیاددەبێت، هەرچەندە تائێستا توێژینەوەکە بڕیاری فراوانی لەسەر نەدراوە، بەڵام هۆشدارییەکە بۆ لێکەوتە مەترسیدارەکانی دەرمانەکە.
د. ئەندرۆ لی، گوتەبێژی ئەکادیمیای ئەمریکی بۆ چاو دەڵێت: باشترە لە هەموو دۆخێکدا دەرمانەکان بە راوێژی پزیشک وەربگیرێن، چونکە پزیشک مێژووی نەخۆشەکە و گونجاویی دەرمانەکە رەچاودەکات.
بەگوێرەی ناوەندی خزمەتگوزاریی تەندروستیی نیشتمانیی بەریتانیا NHS، ژمارەی قوربانییانی دەرمانەکانی قەڵەوی زیادبووە و زۆرینەشیان بەکارهێنەرانی دەرمانە ساختەکانی ئۆنلاینن.
ناوەندی خزمەتگوزاریی تەندروستیی نیشتمانیی NHS لە بەریتانیا رایدەگەیێنێت، دەرمانەکان قەڵەوی سەرەتا بۆ نەخۆشیی شەکرەی جۆری دوو بەکاردەهاتن و ئێستاش بە ئەو کەسانە دەدرێت کە نەخۆشیی شەکرە و دڵیان هەیە و قەڵەون، هەروەها پسپۆڕان دەڵێن، ئەو دەرمانانە چارەسەرێکی خێرا و جێگرەوە نین بۆ خۆراکی باش و وەرزشکردن، هەروەها پێویستە تەنیا لەژێر چاودێریی پزیشکدا بەکاربێن.