رووداو - تەندروستی
توێژینەوەیەک لە ئەمریکا کراوە و دەرکەوتووە، ئەو خوو و رەفتارە تەندروستییانەی مرۆڤ لە قۆناخی منداڵیدا فێریان دەبێت، کاریگەرییەکی راستەوخۆی لەسەر تەندروستیی قۆناخی گەورەییدا هەیە.
زانکۆی جۆرجیا لە ئەمریکا دەریدەخات، ئەو منداڵانەی سیستمی خۆراکیی تەندروست پەیڕەو دەکەن و چالاکیی جەستەییان هەیە، ئەگەری ئەوەیان زۆرترە کە لە تەمەنی گەورەییدا کێشیان ئاسایی بێت و کەمتر تووشی نەخۆشییە درێژخایەنەکانی بن.
زانکۆ ئەمریکییەکە ئاماژە بەوەدەکات، پەیوەندی هەیە لەنێوان خووەکانی منداڵی و دەرئەنجامە تەندروستییەکانی لە داهاتوودا بۆ نموونە، ئەو منداڵانەی کە زۆرتر خواردنی خێرا و شیرینی دەخۆن و کاتێکی زۆر لەبەردەم شاشەکان بەسەر دەبەن، زیاتر رووبەڕووی کێشە تەندروستییەکان دەبنەوە.
د. ئالان رۆجەرز، سەرپەرشتیاری سەرەکیی توێژینەوەکە، رایگەیاند: "ئەنجامەکانمان جەخت لەوە دەکەنەوە کە قۆناخی منداڵی کاتێکی زێڕینە بۆ بنیادنانی ژیانێکی تەندروست، ئەو خووانەی لەو تەمەنەدا دروست دەبن، وەک نەخشێک لەسەر بەرد وان و گۆڕینیان لە داهاتوودا زۆر قورستر دەبێت."