هەڵەیەک روویدا! دووبارە هەوڵبدە
رووداو - تەندروستی
لە سلێمانی کارگەیەکی بەرهەمهێنانی ژیناو دەکرێتەوە و هەلی کار بۆ 400 کەس دابیندەکات.
ئەمڕۆ پێنجشەممە 7ـی ئاداری 2024 بە ئامادەبوونی وەزیری تەندروستیی عێراق کارگەیەکی نوێ بۆ بەرهەمهێنان و دروستکردنی ژیناو لەلایەن کۆمپانیای پایۆنیر دەکرێتەوە، ئامانج لە کردنەوەی کارگەکە بەرهەمی زیاتری ژیناوە بۆ تەواوی هەرێمی کوردستان و عێراق.
ژیناوەکان بە قەبارەی 100 ملیلیتر تاوەکو 5000 ملیلیتر دەبن و بە گوتەی کۆمپانیاکە، ئاستی بەرهەمهێنانیان بەجۆرێک دەبێت کە هاوردەی هەریەک لە وڵاتانی عومان، ئیمارات و ئوردنیش بکەن.
بەگوێرەی کۆمپانیای پایۆنیر، کارگەیەکە هەلی کار بۆ 400 کەس دەڕەخسێنێت و توانای بەرهەمهێنان لە 30 ملیۆن بتڵی ژیناو بۆ 65 ملیۆن بتڵ لە ساڵێکدا بەرزدەکاتەوە.
ژیناو گیراوەیەکی پزیشکییە و بۆ جێگرەوەی مادە خۆراکی و کانزاییەکانی جەستە بەکاردەهێندرێت، تاوەکو چارەخواز بەهۆی کێشە تەندروستییەکەیەوە ئەو مادە خۆراکی و کانزاییانەی لە جەستەی کەمبووەتەوە، بە ژیناو قەرەبووی بۆ بکرێتەوە و کەمیی ئەو مادانە ژیانی نەخەنە مەترسییەوە.
بە گشتی ژیناوەکان جۆر و قەبارەی جیاوازییان هەیە کە هەریەکەیان بۆ مەبەستی جیاوازی پزیشکی بەکاردەهێندرێن و باوترینیان جۆری 'نۆرماڵ سەڵاین، گلوکۆز سەڵاین و گلوکۆز وۆتەر'ـە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ