رووداو - تەندروستی
پسپۆڕێکی شەکرە و کوێرەڕژێنەکان رایدەگەیێنێت، نەخۆشییەکانی غودە لەنێو خانماندا زۆرە، ئەمەش بەهۆی گۆڕانکارییە هۆڕمۆنییەکانیانەوە.
ئەمڕۆ پێنجشەممە 8-1-2026 د. داهات حەوێزی، پسپۆڕی شەکرە و کوێرەڕژێنەکان لە بووڵتەنی تەندروستیدا رایگەیاند، رژێنی پەریزادە ''غودە'' تەمبەڵ بێت کەسەکە تووشی لەبیرچوونەوە دەبێت و خانمان زیاتر تووشی غودەی تەمبەڵ دەبن، بەهۆی گۆڕانکارییە هۆڕمۆنییەکان.
د. داهات حەوێزی دەڵێت: پێویستە تووشبووانی نەخۆشیی غودە پابەندی کاتی دەرمانەکانیان بن و مەرج نییە هەموو گرێیەکی غودە شێرپەنجەیی بێت، هەر بۆیە روونی دەکاتەوە ''زۆربەی گرێیەکانی غودە شێرپەنجەیی نین''.
باسی نیشانەکانی غودەی تەمبەڵ دەکات و دەڵێت: غودەی تەمبەڵ زیان بە مێشک دەگەیێنێت و بیرچوونەوە، تێکچوونی میزاج، خەمباری، سستبوون، بێهێزی و سەرمابوون نیشانە سەرەکییەکانیەتی.
بەگویەی ئەو پسپۆڕە، لە هەرێمی کوردستان غودەی تەمبەڵ زیاتر باوە، لەبەر ئەوەی هاونیشتمانییان کەمتر خۆراکە دەریاییەکان دەخۆن و خۆراکە دەریاییەکان رێگری لە غودەی تەمبەڵ دەکەن.