دەزگایەکی ئوسترالی: ژیناو ''موغەزی'' لە جیهاندا کەمبووەتەوە

دەزگای کەلوپەلە چارەسەرییەکانی ئوسترالیا ئاشکرای دەکات، ژمارەی ژیناو لە جیهاندا و بەتایبەتیش لە ئوسترالیا کەمی کردووە، کۆمەڵەی دەرمانسازانی وڵاتەکەش دەڵێت، کارگەکانی بەرهەمهێنانی ژیناو پێویستە 300٪ بەرهەمەکانیان زیادبکەن تاوەکو ئەو پێداویستیانە پڕبکەنەوە کە جیهان پێویستییەتی.

ژیناو گیراوەیەکی پزیشکییە و بۆ جێگرەوەی مادە خۆراکی و کانزاییەکانی جەستە بەکاردەهێندرێت، تاوەکو چارەخواز بەهۆی کێشە تەندروستییەکەیەوە ئەو مادە خۆراکی و کانزاییانەی لە جەستەی کەمبووەتەوە، بە ژیناو قەرەبووی بۆ بکرێتەوە و کەمیی ئەو مادانە ژیانی نەخەنە مەترسییەوە.

بە گشتی ژیناوەکان جۆر و قەبارەی جیاوازییان هەیە کە هەریەکەیان بۆ مەبەستی جیاوازی پزیشکی بەکاردەهێندرێن و باوترینیان جۆری 'نۆرماڵ سەڵاین، گلوکۆز سەڵاین و گلوکۆز وۆتەر'ـە.