زانکۆی ڤیەننا لە نەمسا: لە زستاندا کەمیی ڤیتامین D مەترسیدارە

تویژینەوەکە لە زانکۆی ڤییەننا کراوە و 78 هەزار کەس تیایدا بەشدارییان کرد و دەرکەوت، کەمیی ئاستی ڤیتامین D لە خوێندا، مەترسیی گیانلەدەستدان یاخود مردنی پێشوەختە زیاددەکات.

سەرپەرشتیاری توێژینەوەکە دەڵێت: کەمیی ڤیتامین D هۆکارێکی لاوازبوونی فەرمانەکانی مێشکە و ئەوانەشی کە جەڵتەی دڵ لێیان دەدات، ئەگەر ڤیتامین Dـیان کەمبێت، ئەوا مەترسیی گیانلەدەستدانیان زۆرە، هاوکات هۆکاری زیادبوونی مەترسییەکەی لە وەرزی زستاندا بۆ ئەوەش گەڕاندەوە کە ئەگەری تووشبوون بە جەڵتەی دڵ لە وەرزە ساردەکاندا زۆردەبێت.

کۆمەڵەی ئەڵمانی بۆ خۆراک پێشنیاری ئەوە دەکات، رۆژانە لە نێوان کاژێر 12:00 تاوەکو 15:00 بۆ ماوەی پێنج بۆ 25 خولەک دەموچاو، دەست، قۆڵ و قاچەکان بخرێنە بەرخۆر، بەڵام بەپێی جۆری پێست و کاتەکانی ساڵ ماوەی بەرکەوتن بە تیشکی خۆر دەگۆڕێت. 

تەنانەت کۆمەڵەکە دەڵێت: سوود لە تەواوکەرە خۆراکییەکانی ڤیتامینەکەش وەربگیرێت و لەژێر راوێژی پزیشکدا دەنکۆڵەی تەواوکەرە خۆراکییەکان بەکاربێن.

بە گوێرەی مایۆکلینیک، خۆر، شیر، زەردێنەی هێلکە، قارچک، ماسی و دانەوێڵە سەرچاوەی سەرەکین بۆ بەدەستهێنانی ڤیتامین D.