رووداو - تەندروستی
پسپۆڕێکی نەخۆشییە دەروونییەکان کە ماڵباتەکەی لە کرماشانە و لەنێو جەرگەی بۆردومانەکانی ئەسرائیلن، رایدەگەیێنێت: ئەوانەی باوەڕێکی ئایینیان هەیە دەروونیان لەکاتی ناخۆشی و بەتایبەتیش جەنگدا بەهێزە.
ئەمڕۆ سێشەممە 17-6-2025 د. پگاە عەلی، پسپۆڕی نەخۆشییە دەروونییەکان لە بووڵتەنی تەندروستیدا رایگەیاند، ترس لە لێکەوتەکانی جەنگ لەنێو گەنجاندا زیاترە و کەسانی بەتەمەن لەبەر ئەوەی ئەزموونی دۆخەکەیان کردووە، زیاتر لەلایان ئاساییە.
ئەو پسپۆڕە پەیامێک ئاڕاستەی هاوونیشتمانییانی کرماشان دەکات و دەڵێت: ''ئازیزان ئەمە یەکەمجار نییە ئێوە نەهامەتی ببینن، کەسیش نازانێت لەوانەیە دوا جاریش بێت یان نا، بەڵام مانایەک بۆ ژیانیان پەیدا بکەن و پشت بە خۆتان ببەستن، ئەم رۆژانەش تێدەپەڕێت، هەر سەلامەتی و دڵخۆشی بەشتان بێت''.
بەپێی ئەو پسپۆڕە، کاریگەرییە دەروونییەکانی جەنگ دەشێت ئەمانە بن؛
-بێخەوی
-دڵەڕاوکێ
-بێئاوەزی
-خەمۆکی
-شۆک
- ترسان
-تووڕەیی
-کەمسەرنجی
-گۆشەگیری
-گۆڕان لە رەفتار و بیرکردنەوە
رێگەیەکی کەمکردنەوەی گوشاری دەروونی و دڵەڕاوکێش پێشنیاز دەکات کە تەکنیکی هەناسەدانە، بەجۆرێکە؛ چوار چرکە هەناسە هەڵبمژرێت، چوار چرکە هەناسەکە رابگیرێت و چوار چرکەش هەناسەکە بدرێتەوە.