بۆ یەکەمجار لە کۆریای باشوور چارەسەرێکی نوێی شێرپەنجە تاقیدەکرێتەوە

 

توێژەرانی پەیمانگەی پێشکەوتووی زانست و تەکنەلۆژیای کۆریای باشوور جۆرە چارەسەرێکیان دۆزیوەتەوە کە بەبێ بەکارهێنانی دەرمانی کیمیایی و چارەسەری تیشک، دەتواندرێت چارەسەری شێرپەنجە بکات.

 

پڕۆفیسۆر کوانگ هیو چۆ، توێژەر و سەرپەرشتیارێکی کارەکەیە و دەڵێت: چارەسەرەکە لەڕێگەی سیستمێکی کۆمپیوتەریی ژیریی دەستکردە بە ناوی BENEIN کە توانای ناسینەوە و دەستکاریکردنی جینی بەرپرس لە خانە شێرپەنجەییەکانی هەیە.

 

سیستمەکە توانای دەستنیشانکردنی سێ جینی سەرەکیی شێرپەنجەیی HDAC2، MYB و FOXA2 هەیە و توێژەران پێیان وایە، ئەگەر ئەو جینانە کپ بکرێن، ئەوا گەشەی خانە شێرپەنجەییەکان دەوەستێت.

 

 

چارەسەرە باوەکانی ئێستای شێرپەنجە دەکرێت چەندان کاریگەریی لاوەکییان هەبێت کە بۆ ژیانی تووشبووان ناخۆش بێت و شێوازی ژیانیان تێکبدات، چونکە ئەو چارەسەرانە لەگەڵ لەنێوبردنی خانە شێرپەنجەییەکان، هێرشیش دەکەنە سەر خانە ساخەکانی جەستە.

 

 

توێژەرانی کۆریای باشوور کاریان لەسەر شێرپەنجەی کۆڵۆنی مشک کرد و بۆیان دەرکەوت، گەشەی خانە شێرپەنجەییەکان بە کپکردنی ئەو جینانەن 60٪ بۆ 80٪ کەمبووەتەوە. ئەمەش دوای ئەوەی تەکنەلۆژیاکەیان بەکارهێنا بۆ دەستنیشانکردنی جۆری جینەکە و پاشانیش کپکردنیان.