زانکۆی سانت پێتسبێرگ: چارەسەری کیمیایی نیشانەکانی لەبیرچوونەوە دوادەخات

توێژینەوەکە لە زانکۆی سانت پێتسبێرگ لە رووسیا کرا و دەرکەوت، ئەو تووشبووانەی شێرپەنجەی مەمک کە چارەسەری کیمیاییان بۆ دەکرێت، 7٪ ئەگەری تووشبوونیان بە نەخۆشیی ئەلزەهایمەر کەمبووەتەوە، بەهۆی ئەوەی خانەکانی مێشکیان گۆڕانکارییان بەسەرداهاتووە و چالاکتر بوون. 

فرانسیسماری مۆدوگنۆ، نووسەری باڵای توێژینەوەکە دەڵێت: ''ئەمە مژدەیەکە بۆ تووشبووانی شێرپەنجە کە کاریگەرییەکی ئەرێنیی چارەسەری کیمیای ئاشکرادەکات''.

تەنانەت توێژینەوەکە ئاماژە بەوەشدەکات، کەسانی گەنج زیاتر سوود لە چارەسەرە کیمیاییەکان دەبینن بۆ دووربوون لە لەبیرچوونەوە، بەجۆرێک خانمانی خوار 65 ساڵان 25٪ ئەگەری تووشبوونیان بە نەخۆشییەکە کەمبووەتەوە، بەڵام ئەو رێژەیە لە خانمانی سەروو 65 ساڵان 20٪ بوو.

بە گوێرەی مایۆکلینیک، چارەسەری کیمیایی دەرمانێکە بۆ لەنێوبردنی ئەو خانانەیە کە گەشەیان خێرایە وەکو خانە شێرپەنجەییەکان.