بەرنامەی دکتۆر ئاراس؛ ڤاکسینی سیل نەبووایە، دەبوو بۆ چاکبوونەوە 5 هەزار دەنکە حەب بخۆین

 

د. کاوێس زەنگەنە، پسپۆڕی نەخۆشییەکانی منداڵان میوانە و دەڵێت: هەندێک کوتان هەن کە دژی جۆرە نەخۆشییەکن دەشێت ببنە هۆی ئیفلیجبوون و پەککەوتنی منداڵ کە هەتا ژیانی ماوە پێوەی دەناڵێنێت.

 

ئەو باسی یەکێک لە ڤاکسینەکان دەکات کە بۆ نەخۆشیی سیلە و دەڵێت: ئەوەیە کە شوێنەکەی لەسەر شانی هەمووان دیارە، لەژێر پێست دەدرێت و ئەگەری ئەو کوتانە نەبووایە، بەهۆیەوە کەسێک تووشی کۆکەی درێژخایەن کە لەگەڵیدا خوێنی لەگەڵە تووشی دەبێت و کەسەکە لاواز دەکات، دەشێت ببێتە سیلی مێشك و بە گیانلەدەستدانی کەسەکە کۆتایی بێت. (بەڵام بەهۆی ڤاکسینەوە ئەو مەترسییانە کۆتاییان دێت). 

 

زەنگەنە روونی دەکاتەوە، کەسێک تووشی سیل بوو لە ماوەی 6 مانگدا پێویستە 780 دەنکە حەب وەربگرێت و هەندێکجاریش بۆ چاکبوونەوەی تەواو لە نەخۆشییەکە دەگاتە پێنج هەزار دەنکە حەب. (بەڵام ئەگەر کەسێک بە ڤاکسینەکە کوترابێت، ئەوا ئەمانەی هەموو لەکۆڵ دەبێتەوە).

 

 

 

دکتۆر ئاراس دەڵێت: باوکم لە ساڵی 1995 تووشی سیل بوو، کەوتە ماڵەوە و ماوەیەکی زۆر لەژێر چارەسەریدا بوو، دەرمانی بە زەحمەت دەستدەکەوت، بەڵام لە کۆتاییدا دوای ئەوەی ماوەیەکی زۆر بەدەست نەخۆشییەکەوە ناڵاندی، خۆشبەختانە خودای گەورە یارمەتیدەر بوو و چاک بووەوە. خەریک بوو ماڵباتێک بەهۆی نەخۆشکەوتنی باوکمەوە بێباوک بن. ئەگەر باوکم لە سەردەمی منداڵیدا ڤاکسین هەبووایە و ڤاکسینی وەربگرتایە، نەدەکەوتە نێو ئەو هەموو ئازار و نەخۆشییە.

 

ئەوەشی گوت، ''ئێستا من کە تووشی سیل نەبووم، لەبەر ئەوە بووە کە دایک و باوکم سوور بوون لەسەر ئەوەی کە ڤاکسینەکەم بۆ بکەن''.