شێركۆی هەژار ئەگەرچی لە ساڵانی شەست و حەفتاكاندا قەڵەمێكی دیار و سیاسییەكی چالاك بووە، بەڵام هەمیشە كە ناوی دەهێنرێت بە مام هەژاری باوكییەوە دەناسرێتەوە، ئەوە لە كاتێكدایە كە وەك خۆی دەڵێت، دەمێك بوو ئەو و مام هەژار دوو ئاراستەی جیاوازیان گرتبوو. رەنگە لە زۆر رووەوە دانویان پێكەوە نەكوڵابێت، بەڵام ئەو پێیوایە كەسیان ناهەقییان بەرامبەر یەكدی نەكردووە.
شێركۆ هەژار لە ساڵانی حەفتای سەتەی رابردوودا بەتوندی رەخنە لە سەركردایەتی حیزبێك دەگرێت كە خۆی تێیدا ئەندام بووە (كاژیك). ئەگەر بەرواردێكی دروست بێت، پێدەچێت بە پێوانەی ئەو مەسەلە كوردییە نەڕۆیشتبێ كە دەڵێت "كانییەك ئاوت لێخواردەوە، بەردی تێ فڕێ مەدە"، بۆیە هاتووەتە سەر ئەو بڕوایەی زۆر شتی كاژیك بە نەبوو تەماشا بكات. كاتێك داوای ئەم دیمانەیەم لێكرد، یەكێك لە مەرجەكانی ئەوە بوو كە وێنەی خۆی بڵاوناكاتەوە، لەبەرئەوەی رەنگە لە ئایندەدا دیسان بۆ كورد تێهەڵبچێتەوە، كێ دەڵێت ئەوە تارمایی سڕپارێزی و داخراویی كاژیك نییە كە هێشتا بەسەریەوە ماوە.
تا گەورەتر دەبووم، نێوانم لەگەڵ باوكم بەكێشەتر دەبوو
رووداو: بە كورتیش بێت باسی ژیانی منداڵی خۆتمان بۆ بكە؟ لەكوێ لەدایك بووی؟ لەكوێ دەستت بە خوێندن كرد، ئایا تۆش سەرەتا لەحوجرەكانەوە فێری خوێندەواری بووی؟
شێركۆ هەژار: من ساڵی 1946 لە موكریان لەدایك بووم، لە حوجرە نەمخوێندووە. هێندێكم لای باوكم خوێندووە و ئەوی تر لە خوێندنگەی ئاسایی شارستان. یەكەم هەشت ساڵی تەمەنم، لە ماڵی مامی زۆر خۆشەویستم لە مهاباد ژیاوم، مامە عەبدوڵڵام، پووری زۆر خۆشەویستم زێنەب خان و نەنكی یەكجار زۆر خۆشەویستم مریەم خانی كچی قازی، مامە سادقم (دكتۆر شەرەفكەندی) و مامە رەسوڵ، ئەو مرۆڤە مەزنە، هەموویان لە خۆشەویستیی خۆیاندا نقوم كردووم، بۆ ئەوە یەكجار شانسم هەبووە و نازانم چۆن و بە چ زمانێك سوپاسیان بكەم.
رووداو: ژیانی منداڵیت چۆن بردە سەر، لە نووسینەكانتەوە خوێنەر هەست دەكات خۆت بەمەغدوور دەزانی و بەشێوەیەك هەستت بە هەڵاواردن كردووە، ئەمە تا چەند راستە؟ هەندێك پێیانوایە لە تۆڵەی ئەوەدایە وا بە توندی هێرش دەكەیتە سەر مامۆستا هەژاری باوكت؟
شێركۆ هەژار: ئەوجا چوومەتە بەغدا لای باوكم، بەزوویی زۆرم خۆشویستووە، بەڵام ئیتر تا گەورەتر دەبووم، نێوانم لەگەڵ باوكمدا بەكێشەتر دەبوو. باوكم حەزی دەكرد هەر ئەو منداڵە عاقڵە بمێنمەوە و وادیارە منیش نەمتوانی وا بم.
رووداو: پێتوانییە ناهەقیت بەرامبەر مام هەژار و هەندێك كەسایەتی دیكە كردووە؟
كوردایەتی نەیتوانیوە رێكخراوێكی لە دەرەوەی بارزانییەكان هەبێت
شێركۆ هەژار: مەسەلەی هەقی و ناهەقیی من و هەژار و زۆر كەسی دیكە بەرامبەر یەكتر، شتێكی نیسبییە. مرۆڤ، بەبیری من، لە دنیایەكی لەوە كەمتر ئایدیاڵدا دەژیت كە ناهەقیی بەرامبەر نەكرێت و لەوەش درشتترە كە بتوانێت قەت ناهەقی بەرامبەر كەس نەكات. ئەگەرنا لەڕووی هەستی زاتییەوە، من لام وانییە ناهەقیم بەرامبەر هەژار كردبێت، لام وانییە ئەویش قەت ویستبێتی ناهەقی بەرامبەر من بكات، بەڵام ئیتر هەر كامەمان و لە روانگەی خۆیەوە، بەرێكەوتی رووداوانی ژیان، وەهای بۆ شكاوەتەوە كە نێوانی لەگەڵ ئەوی دیكەدا زۆر ئاسایی نەیەتە بەرچاو.
رووداو: چۆن ئاشنایەتیت لەگەڵ سیاسەتدا پەیداكرد؟ دەوروبەرەكەت هۆكاری تێكەڵاوبوونت بوون بە سیاسەت یان لەرێگای بڕوا و قەناعەتی خۆتەوە بوو؟
شێركۆ هەژار: من لە موحیتی كوردایەتیدا چاوم هەڵێناوە و گەورەبووم. ساڵی 1962 كە تەمەنم 16 ساڵ بوو، چوومە ریزی پارتی دیموكراتی كوردستان، ئەوسا هەر ئەوەمان دەزانی، بوونە شیوعی یان پارتی و شۆڕشی كوردایەتی و بارزانی. نەورۆزی 1963 بووم بە ئەندامی و هەر ئەو نەورۆزە، یان كەمێك دوای ئەوە، بە سەرنجدانی رەفتاری شاندی كورد لە بەغدا كە جەلال تاڵەبانی سەرۆكی بوو، بڕوام بە پارتی دایە كزی. ساڵی 1964 وازم لە پارتی هێنا، چونكە پێموابوو هەر باڵی برایم ئەحمەد و تاڵەبانی حیزبایەتییان دەكرد و بە دابڕانیان لە عەشیرەتی بارزان و چوونیان بۆ لای شای ئێران، ئیتر هیچ ئومێدێكم پێیان نەما. ئەو ساڵە گەیشتمە ئەو نەتیجەیە كە كوردایەتی هیچ رێكخراوێكی لە دەرەوەی ئیدارەی بنەماڵەی بارزانی نەبوو، ئێستاش، دوای 50 ساڵ، لام وایە ئەو وەزعە هەر وەكو خۆی، وەكو پێش ئەو 50 ساڵە پڕكارەساتە ماوەتەوە، كوردایەتی نەیتوانیوە رێكخراوێكی لە دەرەوەی ئیدارەی بارزانییەكان هەبێت.
رووداو: دەربارەی كاژیك و دامەزراندنی كاژیك چی دەڵێیت، كەی بوویت بە ئەندام و لە ڕێگای كێوە بوویت بە كاژیك؟
شێركۆ هەژار: من لە بەغدا هاتوچۆی دۆستێكم دەكرد، ئەندامێكی پارتی كە هاوكارێكی كامیل ژیر بوو لە شیركەتێك لە بەغدا، نێوانی قسەوباس كردنەوەم لەگەڵ كامیل ژیردا دەستپێكرد و لە نەتیجەدا، وادەزانم ئیتر ساڵی 1965 بوو، داوای چوونە ریزی كاژیكم كرد. نامەیەكم بۆ ئەوە دایە كامیل ژیر، دوای ماوەیەكی كەم عەبدوڵڵا ئاگرین پێوەندیی پێوە كردم. دوای ئەو پێوەندیم بە شێركۆ بێكەس، خودی كامیل ژیر و ماوەیەك بە هەڤاڵی زۆر خۆشەویستم مامۆستا فەرەیدوون عەلی ئەمین (ی رەحمەتی) ییەوە هەبوو.
پێوەندیی كاژیك ئەوسا هەر فەردی بوو (یەك كەس پێوەندی بە یەك كەسەوە دەكرد، شانە نەبوون). من لە كتێبێكمدا (كوردی نەتەوەیی و نەتەوەی كوردستان، پەراوێزی ژمارە 17 ، ل 74 تا 77) نموونەم لە چالاكیی نێوان 1966 و 1970ی خۆم بۆ كاژیك باس كردووە. من هەروەك زووتر لە پارتیدا كەوتبوومە گومانەوە، لەم چوار ساڵەشدا تا دەهات پتر لە كاژیك دەكەوتمە گومانەوە. تا ساڵی 1970 ئیتر هەر زۆر لێی سارد ببوومەوە، بەڵام دیسان بە رادەی ئەوە نەبوو كە وازی لێ بهێنم. تا ساڵی 1972 كە عەبدوڵڵا ئاگرین گومانەكانمی بۆ سەلماندم و پێیگوتم: نە حیزب هەیە و نە هیچ، هەمووی وازی هێناوە، هەر من و چەند كەسێكی لەبەردەستی مندا ماونەوە و تەواو.
زۆرم هەوڵ دا قەناعەتی پێبكەم كە ئەندامان لە رێگای كۆنگرەیەكەوە رووبەڕووی حەقیقەت بكرێنەوە و بتوانن بڕیاری چارەنووسی خۆیان بدەن، بێ فایدە بوو، قەبووڵی نەكرد. ئەو بە دەستخەتی خۆی، بەناوی سەركردایەتی و لق و هەرچی، چەند كەسێكی بە خۆیەوە راگرتبوون. كاتێك ئەوە لە مامۆستا عوسمان رەشید روون بووەوە و بەگژ عەبدوڵڵا ئاگریندا چوو، ئاگرین فەرمانی كوشتنی مامۆستا عوسمانی دەركرد و... ئەوی تریش ئیتر لە نووسینەكەی كاك ئازاد (هێندێك بیرەوەریی رۆژانی كاژیك)دا هەیە.
شێركۆ بێكەس لە كاژیك دەرنەكرا و خۆی وازی هێنا
رووداو: جگە لە كاژیكنامە، ئایا هیچ بڵاوكراوەیەكی دیكە هەبوو كە بیروباوەڕی كاژیكی تێدا بڵاوبكرێتەوە؟
شێركۆ هەژار: ساڵانی شێستەكان هێندێك دەستخەت بەناوی "چرای كوردستان" و "نەوەی كورد" دەرچوون و دكتۆر جەمال نەبەز لە ئەوروپا ناوبەناو، بە مەیلی خۆی هێندێك شتی نووسیون و تەواو.
رووداو: سەرچاوەی بیری كاژیك لە كوێوە هەڵدەهێنجرا، دەڵێن سەركردەكانی كاژیك زۆر لەژێر كاریگەری نووسەری عەرەب (ساتع ئەلحەسری)دا بوون؟
شێركۆ هەژار: "ساتع ئەلحەسری" و "ئەلبەیتار" و "عەفلەق" و یەك دوو سەرچاوەی دیكەی ناسیۆنالیستی عارەب، ئیلهامیان داوە بە چەند كەسێك كە بە لاساكردنەوەی ئەوان كتێبێك بنووسن و ناوی بنێن " كاژیكنامە". من ئەو سەرچاوانەم خوێندوونەوە و كاژیكنامەشم خوێندووەتەوە. لاساكردنەوەیەكی زۆر ساویلكە و منداڵانەی قسەی ئەوانە.
رووداو: شێركۆ بێكەس دەڵێت لەبەر ئەوەی سەركردەیەكی كاژیك سەركۆنەی كردووە چونكە شیعرێكی بۆ چێ گیڤارا نووسیوە، ئەوە وای لێدەكات واز لە كاژیك بێنێت؟ بەڵام كامیل ژیر دەڵێت كاژیك خۆی دەریكردووە، چونكە كەسێك بووە هەمیشە مەست بووە و بەكەڵكی كاژیك نەهاتووە؟
شێركۆ هەژار: شێركۆ بێكەس، بەڵێ دەیخواردەوە، بەڵام بەشێوەیەكی زۆر ئاسایی و وەكو هەموو هەڤاڵەكانی، دەركردنی كەسێك لە كاژیك؟ نەخێر نەوەڵڵا، زۆر بەداخەوە كە كامیل ژیر ئەو بوختانانە دەكات.
من نازانم ئەگەر شێركۆ بێكەس بەهۆی رووداوێكەوە سەرەتا وازی لە كاژیك هێنابێت. بەڵام خۆی وازی هێنا و حەتمەن بڕوای پێ نەمابوو، هاوكاریی منیشی لە سەركردایەتی كاتیی كاژیكدا كرد، نەهاتە ریزەوە بەڵام شتی لەدژی سەركردایەتی كۆن بۆ نووسین، چاپمان كرد و- لەسەر داوای خۆی - بەناوی خۆمان بڵاومانكردەوە، ئەوە تاقە نووسینێكی سەركردایەتی كاتیمان بوو كە من نەمنووسیبوو، هەموو نووسینەكانی تر و بەیاننامەكان من نووسیومن، تەنیا من.
مەسەلەی بەدمەستی و دەركران و ئەو قسانە، زۆر بەداخەوە، فڕیان بەسەر حەقیقەتەوە نییە. وەكو ئەوە كە كامیل ژیر من بە "جەلالی" ناودەبات، لەكاتێكدا كە ئەو پەراوێزەی ژمارە 17، ل 74 تا 77ی كتێبی "كوردی نەتەوەیی و نەتەوەی كوردستان"ی من ببینی، دەزانیت ئەو قسەیەی هەڵگێڕانەوەیەكی زۆر دزێوی حەقیقەتە. جەمال نەبەز لەسەر داوای كامیل ژیر شتێكی لەسەر 11ی ئازار نووسیوە، بەڵێ بەناوی كاژیكە، بەڵام حیزبێك بەناوی كاژیك لە ئارادا نەبوو، وەهم... هەر وەهم پێ فرۆشتنی ناوبەناوی چەند نەفەرێك بوو.
ئەوانە تەنانەت ئیدریس بارزانی بە كاژیك ناودەبەن! زۆری تریش لەوانەی وەكو ئیدریس ناویان دەبەن، بە نموونە عەلی بەگی جافی هەڤاڵی من، هەر قەت فڕیان بەسەر كاژیكەوە نەبووە، من جارێك كاژیكنامەم پێشانی عەلی بەگ دا و... ئیتر هەر ئەوەندە بوو، نە كاژیك و نە هیچ. كامیل ژیر و عەبدوڵڵا ئاگرین و هێندێكی تریشیان، لە ڕووی خوێندەواری و هۆشیارییەوە زۆر كول و بەدبەختن و تووڕەن و بوختان دەكەن و... ئیدی، من لە " هەژاری مرۆڤ ...- بەرگی سێیەم"دا، فەسڵی 66، ل 401 تا 409، باسی جەمال نەبەزم كردووە. ئەوانە قەت مرۆڤی خەبات و فكر و شۆڕش و ئەو شتانە نەبوون. من نەمویست لەسەر ئەو لایەنانەیان بدوێم، ئەوجا من پێش ئەم وەڵامەی دوایینم، هێندێك شتم بۆ نووسین. لێم روون نییە ئێستا دەبێت وەڵامی چیم لە بیرچووبێت.
رووداو: كێشە ناوخۆییەكانی كاژیك چی بوون؟
شێركۆ هەژار: من گوتم: چەند خوێندەوارێكی سلێمانی (مامۆستا، شاعیر... ئیدی)، بای عاتیفەیەكی ناسیۆنالیستی لێیداون، پێكەوە شتێكیان بەناوی "كاژیكنامە" نووسیوە و لە جەوهەردا تەواو. نە پرۆگرام، نە پێڕەوی ناوخۆ، نە نەخشەیەكی كار، نە چاپ، نە كۆبوونەوەی رابەرایەتییەك ... هیچ . بە زوویی، گرنگترینیان، جەمال نەبەز (ئەوسا دكتۆر نەبوو) بۆ تاسەر دەچێتە تاراوگە و لەوێوە ناوبەناو، بە مەیلی شەخسیی خۆی شتێك دەنووسێت، ئەوانی دیكە ئیتر هەر ناوێرن- جێژناوجێژن نەبێت- هەر سەر لە ماڵی یەكتریش بدەن، نەوەكا گومانی شتێكیان لێ بكرێت كە بۆ ژیانیان خەتەر بێت. لە كاتێكدا، زۆر ناسەركەوتووانە، هەموو سلێمانیش پێی دەزانین كە ئەوانە كاژیك بوون: كامیل ژیر و فەرەیدوون و هەردی ... ئیدی! واتا كێشەكە ئەوە بوو كە هەر لەسەرەتاوە مەرجەكانی "حیزب"ێكیان تێدا نەبووە. بەرنامە و پێڕەوێك نەبووە ئەوانە بە نەزمێكەوە ببەستێتەوە، گوتارێكی " كاژیكنامە" بەشی پرۆژەی كار ناكات.
سەركردەكانی كاژیك ئەهلی سیاسەت نەبوون
رووداو: هەڵوێستی كاژیك لەسەر شۆڕشی ئەیلوول چۆن بوو؟
شێركۆ هەژار: كاژیك، كە حیزب نەبووە، هەر ئەو چەند شاعیرو شتە، بە زوویی بڵاوەیان كردووە، هەستی نەتەوەییان هەبووە و دەبێت پێیان خۆشبووبێت كورد رادەپەڕێت. ئەو ناوبەناو چەند دەستخەت و جەمال نەبەز لە ئەوروپا لای خۆیەوە دیارە لایەنگری شۆڕش بوون. عاتیفەی نەتەوەیی كەسانێكی وا لێكردووە دۆستی "وەهم"ی كاژیك بن، بەنموونە كاك فەتاح (هێزی خەبات)، بەڵام هەر عاتیفەكە بووە.
رووداو: كاژیك خۆی كاكە حەمەی عەزیز و شێخ محەممەد هەرسینی ناردە لای مستەفا بارزانی؟
شێركۆ هەژار: نازانم.. دەزانم كاتێك چوونە لای بارزانی، ئیتر دوای ئەوە بە هیچ جۆرێك هیچ كارێكی دیكەی سیاسییان جگە لە خزمەتی ماڵی بارزانی، وەك هەر مرۆڤێكی بارزانی، نەكرد، ئیتر بوون بە پیاوی ئەو دیوەخانە و تەواو، هیچی تریان نەبوو. من خۆم لە بردنەوە سەریەكی شتەكان وای بۆ دەچم كە هەرسینی و حەمەی عەزیز (پارتی گەلی كورد)یان بۆ ئەوە دامەزراندبێت تاكو بەو رێگایەوە جێگایەك لای بارزانی بۆخۆیان پەیدابكەن و كە كاژیكیش هەبووە، چوونەكەیان بۆ لای بارزانی بەناوی كاژیكەوە پێ باشتریش بووە، ئیتر چوونە كاژیكەوە. بەڵام ئیتر ئەمە بردنەوەسەریەكی منە، نە پتر.
رووداو: هەڵوێستی مستەفا بارزانی لەسەر كاژیك بەتایبەتی و نەتەوەییەكان بەگشتی چی بوو؟
شێركۆ هەژار: بە هیچی نەدەزانین، چونكە هیچ نەبوون.
رووداو: بۆچی كاژیك پشتی باڵی مەلایی گرت و دژی جەلالییەكان بوو؟
شێركۆ هەژار: هەرسینی و حەمەی عەزیز و عەبدوڵڵا ئاگرین هەر لە سەرەتاوە لای بارزانی بوون، ماوەیەك فەرەیدوون عەلی ئەمینیش پێشمەرگە بوو، كاك فەتاحیش پێشمەرگە بوو، ئەوانە سنوورێكیان لە نێوان بارزانی و "عاتیفەی كاژیك"ی (وەهم)دا نەدەدیت. پیاوەكانی بارزانی دیارە لە خزمەت بارزانیدا دەمێننەوە. پێوەندیی چەند نەفەرێكی دیكە (كامیل ژیر بەنموونە) لە حەلەقەیەكی عاتیفەی بێ رێكخراو، بێ پێڕەوی ناوخۆ و بێ بەرنامە، لێرەدا شوێنی نییە، خەریكی وەزیفە و ژیانی تایبەتی خۆیان بوون.
رووداو: هەڵوێستی كاژیك لەسەر 11ی ئازار چۆن بوو؟
شێركۆ هەژار: كامیل ژیر دوای بەیانی 11ی ئازار چووە لای جەمال نەبەز و، نەبەز یەك یان دوو بەیانی بۆ نووسی، تێیدا لایەنگریی كاژیكی بۆ رێككەوتنی 11ی ئازار دەربڕی. دیسان، كامیل ژیر و نەبەز لە خۆیانەوە ئەو شتەیان كردووە، حیزبێك بە ناوی كاژیك لە ئارادا نەبووە.
رووداو: تۆ بۆخۆت لەناو كاژیكدا رۆڵ و بەرپرسیارێتیت چی بوو؟
شێركۆ هەژار: كاژیك پرۆگرام و پێڕەوی ناوخۆی نەبوو، حیزب نەبوو، جۆرە كلوبێكی بچووكی بێ نەزمی پێوەندیی تاك بۆ تاك بوو. بە منیان گوت تۆ ئەندامیت، ئەوجا من بووم بە رێكخەری چەند تاكێك بە جیا، لە ریزی جەلالییەكاندا دەورم دیتووە (كە لە پەراوێزی كتێبی "كوردی نەتەوەیی و نەتەوەی كوردستان"دا روونم كردووەتەوە). كۆتایی 1973 دەستم بەسەر رێكخستنی كاژیكدا گرت (كاك ئازاد بە درێژی باسی كردووە چۆن)، ویستم كۆنگرەیەك رێكبخەم كە شتەكان تێیدا ساغ ببنەوەو بەلایەكدا بكەون. ساڵی 1974 لەناو پێشمەرگەدا زۆر چالاك بووین و زۆر بەیاننامەمان بۆ بەرزكردنەوەی ورەی پێشمەرگە نووسین، لەوانە – بەنموونە- بەیاننامەیەك لە یادی شەهیدبوونی فەرماندەیەكی پێشمەرگەی ئەندامی كاژیك عومەر ساڵح مەنسوور لەناو پێشمەرگەدا زۆر دەنگی دایەوە.
رووداو: لە ساڵی 1974 بەیاننامەیەك دژی سەركردایەتی كاژیك بڵاوكرایەوە، ئێوەش لەناو ئەو ئەندامانەدا بوون كە ئیمزاتان كردووە؟ بۆ ئەو بەیاننامەیەتان دەركرد و مەبەستتان چی بوو، دەكرێت ناوی ئەو كەسانە بڵێن كە بەشدار بوون؟
شێركۆ هەژار: من ئەو بەیانەم بەناوی سەركردایەتی كاژیك نووسیوە و بە پێشنیازی مامۆستا عوسمان رەشید و رەزامەندی كاك ئازاد، ئەوسا هەر ئەو سێیە لە سەركردایەتی كاژیكدا مابووینەوە. بۆچی ئەو بەیاننامەیە؟
یەك: وامان بیستەوە كە كۆبوونەوەیەك كراوە، هەردی و چەند كەسێكی تێدا بوون، دەیانەوێت بە ناوی كاژیك كارێك لەدژی ئێمە بكەن، ئێمە بەم بەیانە ویستمان بڵێین ئەوانە دەركراون و "ئێمە" بڕیار لەسەر كاژیك دەدەین.
دوو: بزووتنەوەیەكی نوێ دەیەوێت خۆی بە پێشمەرگە و هێزە سیاسییەكان بناسێنێ و هەنگاوی یەكەمی ئێمە بۆ ئەوە ئەم بەیانە بوو.
رووداو: دەوری حیزبی شیوعی – قیادەی مەركەزی چی بوو، دەڵێن بەهاندانی ئەوان ئەو بەیاننامەیەتان دەركردووە و فاروقی مەلا مستەفا هاوكاری كردوون؟ تەنانەت هەر لای ئەوانیش چاپتان كردووە؟
پاسۆك تاقە یەك دانەشیان تێدا نەبوو مانای وشەی "سۆسیالیست" بزانێت
شێركۆ هەژار: دەوری هیچ نەبوو و فڕی بەسەر هیچی ئێمەوە نەبوو. یەك سەعات دانیشتنێكی من و فارووقی مەلا مستەفا لە ماڵی شێركۆ بێكەس هەبوو، هەر بۆ گۆڕینەوەی بیروڕای دوو كەسی دنیای سیاسەت، داماننا دیسان یەكتر ببینین، بەڵام هەرەس هات و نەبوو. ئێمە خۆمان هەموو شتێكی خۆمان چاپ كردووەو بۆ ئەوە پێویستیمان بە كەس نەبووە.
رووداو: گلەیی ئەوەتان لێدەكرێت كە ئێوە ناوی سەركردەكانی كاژیكتان نووسیوە بە رەمزیش بێت، وەكو (١.ه) كە هەموو كەس دەزانێت مەبەست ئەحمەد هەردییە؟ ئەمە تا چەند راستە و مەبەستتان چی بوو لەوە؟
شێركۆ هەژار: ئەوە راستە، من روونمكردەوە كە دەمانویست ئیعتیباری نوێنەریی كاژیك لەوانە بستێنین، نەوەكا بەناوی كاژیك لەگەڵ كۆنە ئەندامانێك و پێشمەرگەدا بدوێن و كار لە دژی ئێمە بكەن.
رووداو: هەڵوێستی پارتی و بارزانی لەسەر ئەو بەیاننامەیە چی بوو؟
شێركۆ هەژار: مێشیشیان میوان نەبوو. دەڵێن لە سەرەتای 1975 فەرمانی گرتنمان لەلایەن پاراستنەوە دەرچووە ... هەشتا كەس و نازانم چی، سەیر نییە راست بێت، بەڵام من بەڵگەی تەواوم بۆ ئەو قسەیە نەدیتووە.
رووداو: دوای دەركردنی ئەو بەیاننامەیە، ئەو گرووپە چیتان كرد؟ ئایا درێژەتان بەكاری سیاسی دا، بە چ ناوێكەوە؟
شێركۆ هەژار: پێنج - شەش حەفتەیەك دوای ئەو بەیانە، هەرەسی شۆڕش بڵاوەی پێكردین.
رووداو: بۆچی كاژیك نەیتوانی ببێتە پارتێكی جەماوەری و تەنیا لەناو نوخبەیەكدا مایەوە و گەورە نەبوو؟
شێركۆ هەژار: عاتیفەی سێ چوار شاعیر و نووسەر بەشی ئەوەی نەدەكرد حیزبێكی سیاسی پێكبهێنێ. قەت نەبوو.
رووداو: دەڵێن سەركردەكانی كاژیك سیاسی نەبوون؟
شێركۆ هەژار: نەخێر ئەهلی سیاسەت نەبوون، ئەوانە كێشەی رەوانییان زۆر هەبوو.
رووداو: كاژیك بەفەرمی هەڵوەشاوەتەوە یان كارەكانی سڕكراوە؟
شێركۆ هەژار: كاژیك قەت كاری نەكردووە تا بوەستێت، من دەمگوت ئەگەر كارناكەن بەرەسمی بیڵێن، رایبگەیەنن تا ئەوەی لەگەڵتانە بزانێت چ باسە، دەیانویست شتەكە هەر بە وەهم بمێنێتەوە، بەبێ ئەوەی بەڕاستی هەبێت و تووشی كێشەیان بكات.
رووداو: ئێوە لە دامەزراندنی پاسۆكدا، دەورتان چی بووە؟
شێركۆ هەژار: هیچ.
رووداو: پاسۆك درێژكراوەی كاژیك نەبوو؟
شێركۆ هەژار: ئەوەندەی من بزانم، دامەزرێنەرانی پاسۆك پێشتر ئەندامانی كاژیك بوون. كاژیك چەندە فكری هەبوو، ئەمانیش هەر ئەوەندە، تاقە یەك دانەشیان تێدا نەبوو مانای وشەی "سۆسیالیست" بزانێت، جەمال نەبەز بۆ مەبەستی خۆی لەناوی "نەتەوەیی"ی دوورخستەوە و "سۆسیالیست"ی بۆ هەڵبژاردن. وەهم... هەمیشە وەهم.
رووداو: بۆچی ئێوە نەگەڕانەوە بۆ كوردستان و بەشداری لە شۆڕشدا بكەن؟ لەكاتێكدا سەركردەكانی یەكێتی و لایەنەكانی دیكە ئەوروپایان بەجێهێشت و گەڕانەوە بۆ كوردستان؟
شێركۆ هەژار: ئەوانە گەڕانەوە لای حیزبێكی كە هەیانبوو، من هیچم نەبوو. ساڵی 1979 هاتمەوە كوردستان، هەوڵێكم دا كۆنگرەكەی كە لە 1975 پێكنەهاتبوو، ئەمجارە پێكبێت، هەموو كۆنەكاژیكەكان، بە پاسۆكیشەوە تێدا بن. بەڵام سەری نەگرت.
رووداو: پاسۆكیش لەلایەنی رێكخستنەوە وەكو كاژیك نەیتوانی سنوورەكان و بگرە هەموو باشووری كوردستان بگرێتەوە، هۆكاری ئەمە چییە؟
شێركۆ هەژار: چونكە لە هەموو روویەكەوە پەڕپووت بوون و قەت نەیانتوانی ببنە حیزب. لە كاژیك هیچ فێر نەببوون و بێ ئەزموون و زۆر نەزان بوون، عاتیفەیەك بوون و هیچی تر.
رووداو: بۆچی نەتەوەییەكان دانویان لەگەڵ یەك ناكوڵێت و هەمیشە لە دژی یەك قسەدەكەن؟
شێركۆ هەژار: چونكە بناغەی یەكترناسینیان هەر عاتیفە بوو، بناغەیەكی بۆش، هیچ پرۆگرامێكی نەتەوەیی هێشتا نەهاتووەتە سەر شانۆ، تاكو بڵێین ئەمانە نەتەوەیین و لە خەڵكی تریان جیابكەینەوە.
رووداو: باسی ئەوە دەكرێت خەڵكانی نەتەوەیی وەكو ئێوە هێندە سیقەتان نییە بە هاوبیرەكانتان تەنانەت كە دەچن بۆ وڵاتێكی دیكە كافێ و چاییش لەگەڵ خۆتان دەبەن، یان كەس شوێنی ژیانی ئێوە نازانێ؟ ئەگەر وابێت چۆن دەكرێت وڵاتێك رزگاربكرێت و ئەو هەموو داگیركەرە وەدەربنرێن؟ ئایا ئەمە وەهمە یان راستیە كە داگیركەران وا بە چرای رۆنگەرچەكەوە بەدوای ئێوەمانانەوە بن؟
شێركۆ هەژار: هەمان وەڵام.
رووداو: ئایندەی بیری نەتەوەیی لە كوردستان چۆن دەبینن؟ بەم حاڵەوە كورد دەتوانێت دەوڵەت دروست بكات؟
شێركۆ هەژار: ئێستا بیری نەتەوەیی كوردستانی، جگە لە بنەماڵەی بارزانی و بەوشێوە كۆنەی خۆیان، هیچ رێكخراوێكی نییە.
رووداو: بنەماڵەی بارزانی دەتوانن دەوڵەتێك دروست بكەن؟
شێركۆ هەژار: بە زەحمەتی دەبینم، نازانم.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ