مەفرەزەیەکی داعش كەوتە بۆسەیەکی پێشمەرگە

رووداو- دهۆک 

لە میحوەری ناوەران 7 چەكداری داعش لەكاتی هەوڵدان بۆ هێرشكردن، كەوتنە بۆسەیەکی پێشمەرگەوە و سەرجەمیان كوژران.

سەربەست تروانشی، سەرپەرشتیاری هێزی پێشمەرگە لە میحوەری ناوەران بە تۆڕی میدیایی رووداوی راگەیاند "ئێوارەی رۆژی هەینی 1/1/2016، مەفرەزەیەکی داعش کە لە 7 چەکدار پێکهاتبوو، لە میحوەری ناوەران كەوتنە بۆسەیەکی پێشمەرگەوە و سەرجەمیان كوژران".

بە گوتەی سەربەست تراونشی، ئەو چەكدارانەی داعش هەوڵی دزەكرنیان بۆ نێو سەنگەرێكی پێشمەرگە داوە، بەڵام پێش گەیشتنیان كەوتوونە بۆسەیەکی پێشمەرگە و سەرجەمیان کوژراون.

سەربەست تروانشی ئاماژەی بەوەش کرد، نیوەڕۆی ئەمڕۆ زرێپۆشێکی داعش کە چەند چەکدارێکی تێدابووە، لە رێگەی موسڵ - خرساباد لەلایەن پێشمەرگە تێکشکێنراوە و سەرنشینەكانی کوژراون.

میحوەری ناوەرانی هێزی پێشمەرگە دەكەوێتە دەشتی نەینەواو كەمتر لە 10 كیلۆمەتر لە شاری موسڵەوە دوورە، نزیكی ئەو میحوەرەش وایكردووە بەردەوام پێكدادانی تێدا رووبدات. لە ماوەی رابردووداو چەندینجار چەكدارانی داعش هێرشیان كردووەتە سەر هێزی پێشمەرگە، بەڵام تێكشكێندراون.

• به‌شی بكه‌ لە
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger