کەشناسی: ئێوارەی ئەمڕۆ کاریگەریى خۆڵبارین کەمتر دەبێتەوە

کەشناسیی هەرێمی کوردستان، ئەمڕۆ سێشەممە بڵاوی کردەوە، "ئەمڕۆ ئاسمان خۆڵاوى دەبێت، لە ئێوارەدا کاریگەریى خۆڵبارین لەسەر ناوچەکەمان کەمتر دەبێتەوە؛ سبەی ئاسمان ساماڵ دەبێت و پێشبینیی تۆزێکى کەم لەسەر هەندێ ناوچە دەکرێت."

شاڵاو هیدایەت، شارەزای کەشناسی بە تۆڕی میدیایی رووداوی گوت: "ئەو شەپۆلەی خۆڵبارینە، دوای نیوەڕۆ و لە کاتەکانی ئێوارەدا بەرەو کەمبوونەوە دەڕوات؛ کاریگەریی کەم دەبێتەوە و کۆتاییدێت."

بە گوتەی ئەو کەشناسە، سبەی چوارشەممە ئەگەری خۆڵبارینێکی سووک هەیە؛ لە هەفتەی داهاتووشدا، پێشبینی دەکرێت دەستپێبکاتەوە و لە هەندێ شوێندا خۆڵبارینێکی چڕ هەبێت. تاوەکو با لە رۆژئاواوە هەڵبکات و بگاتە 20 کم لە کاژێرێکدا، ئەگەری خۆڵبارین زیاترە.

لەبارەی دابەزینی پلەی گەرماوە، شاڵاو هیدایەت دەڵێت، پێشبینی دەکرێت ئەمڕۆ 5 پلەی سیلیزی داببەزێت و کەشوهەوا فێنک بێت. پێشبینی دەکرێت دابەزینی پلەی گەرما هەفتەیەک بەردەوام ببێت.

شاڵاو هیدایەت گوتیشی: "بەهۆی جێگریبوونی شەپۆلێکی گەرما لەسەر ناوچەکانی نێوەڕاست و رۆژئاوای ئەورووپا، ئەمەش وایکردووە پلەی گەرما لە ناوچەکانی ئێمە داببەزێت و پێشبینی دەکرێت ئەم هەفتەیە پلەی گەرما بەرزنەبێتەوە."

بە گوێرەی کەشناسیی هەرێمی کوردستان، پلەی گەرمای پێشبینیکراوی سبەی چوارشەممە بەم جۆرەیە:

هەولێر: 39 پلەی سیلیزی

سلێمانی: 37 پلەی سیلیزی

دهۆک: 37 پلەی سیلیزی

کەرکووک: 41 پلەی سیلیزی

زاخۆ: 37 پلەی سیلیزی

هەڵەبجە: 39 پلەی سیلیزی

سۆران: 37 پلەی سیلیزی

حاجی ئۆمەران: 27 پلەی سیلیزی

گەرمیان: 43 پلەی سیلیزی