هاوپەیمانێتییەک: بەهۆی وشەی 'گۆڕان'ەوە کۆمیسیۆن ناوەکەی پێ گۆڕین

 

رۆژی سێشەممە 1-8-2023، یاسر سالم، ئەندامی مەکتەبی سیاسیی حیزبی شیوعی عێراق بە تۆڕی میدیایی رووداوی گوت: "ئێمە 12 حیزب، کۆمەڵە، گردبوونەوەی سیاسی و کۆمەڵایەتی و ژمارەیەک سیاسەتمەدار هاوپەیمانێتییەکمان بۆ بەشداریکردن لە هەڵبژاردنی ئەنجوومەنی پارێزگاکان بەناوی هاوپەیمانیی هێزەکانی گۆڕانی دیموکراسی پێشکێشکرد، بەڵام کۆمیسیۆنی هەڵبژاردنەکان بەپاساوی لێکچوونی ناوەکان و نزیکیی ناوەکە لە هێزی دیکەوە، ناوەکەی رەتکردەوە، بەڵام پاساوەکەی کۆمیسیۆن لاوازە، بۆیە ناوەکەمان بۆ هاوپەیمانێتیی بەهاکانی مەدەنی گۆڕی."

 

یاسر سالم پێیوایە، "هۆکاری سیاسی" لە پشت پاساوەکەی کۆمیسیۆنە و دەڵێت: "بەهۆی ئەوە بوو کە بەشێک لە چالاکوانانی خۆپێشاندانەکانی تشرینی 2019 بەشدارن لەگەڵماندا." 

 

بەگوتەی یاسر سالم، هاوپەیمانێتییەکەیان لە سەرجەم پارێزگاکانی عێراق و پارێزگای کەرکووک، بەشداریی لە هەڵبژاردنی ئەنجوومەنی پارێزگاکان دەکات، هەموو ئامادەکارییەکیان کردووە و ناوی بەربژێرەکانیشیان ئامادەن. 

 

هاوپەیمانیی بەهاکانی دیموکراسی لە حیزبی شیوعی عێراق، جوڵانەوەی "نازل أخذ حقي"، پارتی ماڵی نیشتمانی، رەوتی دیموکراتی، رەوتی وەعدی عێراقی، جووڵانەوەی ماڵی عێراقی، بزووتنەوەی تشرینی دیموکراسی، رەوتی کۆمەڵایەتی و دیموکراسی و چەند پارت و پەرلەمانتارێک پێکدێت. 

 

عیماد جەمیل، سەرۆکى تیمى رۆژنامەڤانیى کۆمیسیۆنى باڵاى سەربەخۆى هەڵبژاردنەکانى عێراق بە تۆڕی میدیایی رووداوی گوت: "ئەگەر هاوشێوەیی و نزیکی لە ناوی لیستەکانی بەشدار لە هەڵبژاردنی ئەنجوومەنی پارێزگاکان و هەر هەڵبژاردنێکی دیکە هەبێت، دەبێت بیگۆڕن، چونکە ئەوە رێکارێکی هەڵبژاردنە، هیچ مەبەستێکی سیاسیی لەپشتەوە نییە و بۆ هەمووان وەکو یەکە و ئەو قسانە نادروستن."

 

بڕیارە رۆژی 18-12-2023، هەڵبژاردنی ئەنجوومەنی پارێزگاکانی عێراق بکرێت. لەدواى ئەو هەڵبژاردنە، ئەندامانی ئەنجوومەنى پارێزگان، پارێزگارى نوێ بۆ پارێزگاکانیان هەڵدەبژێرن.