بازاڕێکی بچووک بۆ ساخکردنەوەی هەناری ئەرمشتێ لەنێو گوندەکە کراوەتەوە
رووداو دیجیتاڵ
هەناری گوندی ئەرمشتێ لە سنووری زاخۆ نێوبانگێکی باشی هەیە و لە بازاڕیش خواستێکی زۆری لەسەرە، ئەوەش وایکردووە زیاتر لە 85٪ـی زەویی گوندەکە بکرێتە باخی هەنار.
دەرباس رەمەزان، جووتیارێکی گوندی ئەرمشتێیە و دەڵێت، "ئەم هەنارە نزیکەی 100 ساڵە و لە باوک و باپیرانمانەوە بۆمان ماوەتەوە. ئەم گوندە هەنارەکەی زۆر باشە و لە گوندەکانی دیکە باشترە، خاکی ئەم گوندە تایبەت بۆ هەنار زۆر باش و گونجاوە."
گوندی ئەرمشتێ دەکەوێتە دەشتی سلێڤانەیی لە سنووری ئیدارەی سەربەخۆی زاخۆ. ئێستا وەرزی رنینی هەنارە و جووتیارانی گوندەکە بەرهەمی هەناری ئەمساڵیان لێدەکەنەوە و هەر لەنێو باخەکان بەشێوەیەکی کاتی هەڵیدەگرن.
وەلید محەممەد، فرۆشیار باسی لەوە کرد، "لە مانگی 10 و 11 هەنار لێدەکەینەوە و دەیبەینە کۆگەکان، ئەگەر نەیبەنە ئەم کۆگەیانە، زستان باران لێی دەدات و تێکدەچێت."
هەر لە گوندی ئەرمشتێ بازاڕێکی بچووک کراوەتەوە و رێگە نادرێت خەڵكی گوندەکە و دووکاندارانی گوندەکانی نزیکیش جگە لە هەناری ئەرمشتێ، هیچ جۆرێکی دیکەی هەنار بفرۆشن.
محەممەد سوفی، کڕیار دەڵێت، "ئێمە لەگەڵ چەند هاوڕێ و برادەرێک لە شێخانەوە هاتووین بۆ ئێرە و لێرە هەنار دەکڕین."
ئاری سوبحی، کڕیارێکی دیکەی هەناری ئەرمشتێیە و باسی لەوە کرد، "لەگەڵ هەندێک هاوڕێم هاتووین کە ئەوان ئەم گوندەیان نەبینیبوو. بەردەکەوێت کە ئەو رێگە دوورە ببڕین و بێین هەناری ئەرمشتێ بکڕین، چونکە زۆر بەتام و بەنێوبانگە."
لە گوندەکە 127 باخی هەنار هەیە و 73 جووتیار خاوەندارێتی دەکەن و بەشێک لە جووتیارانی گوندەکە زیاتر لە دوو باخی هەناریان هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ