رووداو - سلێمانی
لە رۆژانی جەژن و رۆژانی دواتردا بە سپۆنسەری میدیایی تۆڕی میدیایی رووداو، فیلمی سینەمایی پەیکەری دڵ لە هەولێر و سلێمانی پیشاندەدرێت. دواتر لە وڵاتانی جیهانیش پیشاندەدرێت.
فیلمی سینەمایی پەیكەری دڵ رۆژانی 2 و 3ی ئە مانگە لە شارەکانی هەولێر و سلێمانی ئۆپنینیگی بۆ دەکرێت و دەناسێندرێت، یەکەم رۆژی جەژنی رەمەزانیش لە شارەکانی هەرێمی کوردستان پیشاندەدرێت.
شوان عەتووف، دەرهێنەری فیلمی سینەمایی پەیكەری دڵ دەڵێت، فیلمەکە لە تەواوی پارێزگا و قەزاکانی هەرێمی کوردستان و دواتر لە ئەوروپا و ئەمریکاش پیشاندەدرێت.
باهۆز نەسرەدین، پرۆدیوسەری فیلمەکە دەڵێت، وێنەگرتن 43 رۆژی خایاندووە. دەشڵێت، کاری باشیان لەسەر فیلمەکە کردووە و چاوەڕوانی ئەوە دەکەن خەڵک پێشوازییەکی گەرمی لێبکات.
پەیكەری دڵ فیلمێكی گۆرانیئامێزی رۆمانسیی و کۆمیدییە، هەریەک لە هونەرمەندان هەڵوێست محەممەد، نزار سەلامی، نارین ئالان و رێشان حەمۆ رۆڵی سەرەکی تیدا دەگێڕن. سەرجەم ستافی فیلمی پەیکەری دڵ کوردن، لە سلێمانی کاری وێنەگرتنی بۆ کراوە.
فیلمی پەیكەری دڵ، بەرهەمی كۆمپانیای میترۆنۆم و کام پرۆدەکشنە، ماوەی فیلمەکە 108 خولەکە، بەشێکی زۆری ئەو گۆرانیانەی لە فیلمەکە گوتراون لە ئاوازی هونەرمەند زیاد ئەسعەد و تێکستییەکانیشیان خودی هەڵوێستە.
